អាជ្ញាធរសហរដ្ឋអាមេរិក បានប្រើប្រាស់ឧស្ម័នបង្ហូរទឹកភ្នែកនៅជិតមជ្ឈមណ្ឌលឃុំឃាំងសហព័ន្ធមួយ ហើយបានចាប់ខ្លួនមនុស្សរាប់សិបនាក់ បន្ទាប់ពីបាតុកម្មដែលគេឱ្យឈ្មោះថា «គ្មានស្តេច» ឬ «No Kings» បានកម្រើកឡើងជាថ្មីនៅចុងសប្តាហ៍នេះទូទាំងសហរដ្ឋអាមេរិក និងនៅអឺរ៉ុប ដើម្បីតវ៉ាប្រឆាំងនឹងសកម្មភាពរបស់លោកប្រធានាធិបតី Donald Trump និងសង្គ្រាមនៅអ៊ីរ៉ង់។

នគរបាលក្រុង Los Angeles បាននិយាយកាលពីថ្ងៃអាទិត្យ (២៩ មីនា) ថា មនុស្សលើសពី ៧០នាក់ ត្រូវបានចាប់ខ្លួនពីបទមិនអើពើនឹងបទបញ្ជាឱ្យបំបែកក្រុម។ អ្នករៀបចំបាតុកម្មនិយាយថា មានព្រឹត្តិការណ៍តវ៉ាជាង ៣.១០០កន្លែង បានធ្វើឡើងក្នុងរដ្ឋទាំង ៥០ របស់សហរដ្ឋអាមេរិក។ របាយការណ៍នានារបស់អាមេរិក ប៉ាន់ប្រមាណថាមានអ្នកចូលរួមសរុបចំនួន ៩សែននាក់ ដែលជាការតវ៉ារយៈពេលមួយថ្ងៃដ៏ធំបំផុតមិនធ្លាប់មាន។

ក្រុមបាតុករជាច្រើនបាននិយាយថា ពួកគេតវ៉ាដោយសារតែសង្រ្គាមនៅអ៊ីរ៉ង់ ហើយថា បន្ទុកនៃជម្លោះត្រូវបានទម្លាក់លើសាធារណជន និងបានបង្វែរការយកចិត្តទុកដាក់ចេញពីបញ្ហាក្នុងស្រុក។ អ្នកផ្សេងទៀតនិយាយថា ពួកគេតវ៉ាព្រោះចង់បានភាពច្បាស់លាស់លើគោលបំណងរបស់សហរដ្ឋអាមេរិកនៅមជ្ឈិមបូព៌ា ដោយចោទប្រកាន់ថា រដ្ឋាភិបាលខ្វះយុទ្ធសាស្ត្រច្បាស់លាស់៕

សង្រ្គាមរវាងអាមេរិក-អ៊ីស្រាអែល ប្រឆាំងនឹងអ៊ីរ៉ង់ បានឈានចូលដល់សប្តាហ៍ទីប្រាំហើយ ដោយមានមនុស្សលើសពី ២.០០០ នាក់បានបាត់បង់ជីវិត ហើយនៅមិនទាន់ឃើញមានសញ្ញានៃការបញ្ចប់នៅឡើយទេ។ ច្រកសមុទ្រហ័រមូសដ៏មានសារៈសំខាន់ នៅតែបន្តបិទជិតស្ទើរតែទាំងស្រុង ដែលបង្កឱ្យតម្លៃថាមពលហក់ឡើងខ្ពស់ និងមានក្ដីបារម្ភអំពីអតិផរណា៕