រដ្ឋបាលខេត្ដសៀមរាប បានអំពាវដល់ប្រជាពលរដ្ឋ ឱ្យធ្វើដំណើរតាមរថយន្តក្រុងដោយមិនគិតថ្លៃ ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ ចាប់ពីថ្ងៃទី១៣ខែមេសា ឆ្នាំ២០២៦ខាងមុខ ខណៈ​ដែលរថយន្ដក្រុងចេញដំណើរពីភ្នំពេញ រយៈពេល៦ថ្ងៃ ចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ​២០២៦ មកកាន់ទីតាំងនៅមណ្ឌលរដ្ឋបាល ខេត្ដសៀមរាប ។

សេចក្ដី​ជូនដំណឹងរបស់រដ្ឋបាលខេត្ដសៀមរាបបានបង្ហាញថា ក្នុងឱកាសពិធី បុណ្យ​ចូល​ឆ្នាំ​ថ្មី​ប្រពៃណី​ជាតិ​ខ្មែរខាងមុខនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះ​រា​ជា​ណា​ចក្រកម្ពុជា បានផ្តល់ជូនមន្ត្រីរាជការ កងកម្លាំងប្រដាប់អាវុធ កម្មករ កម្មការិនី សិស្ស និស្សិត និង​បងប្អូនប្រជាពលរដ្ឋទាំងអស់ ដែលធ្វើដំណើរទៅលេងស្រុកកំណើតជួបជុំបងប្អូន ក្រុម​គ្រួសារ​ពី​រាជ​ធានី​ភ្នំពេញ ទៅតាមបណ្តាខេត្ត និងពីបណ្តាខេត្តត្រឡប់ទៅរាជធានីភ្នំពេញ រយៈពេល​៦ថ្ងៃ ចាប់​ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៦នេះ ដែលការឈប់សម្រាកនេះ ប្រជា​ពលរដ្ឋ​អាច​ធ្វើដំណើរតាមរថយន្ដក្រុង របស់រដ្ឋ ដោយឥតបង់ថ្លៃ និង​មិន​តម្រូវ​កក់​សំបុត្រ​សម្រាប់​ការ​ធ្វើ​ដំណើរ​តាម​រថយន្តក្រុង (City Bus) រាជធានីភ្នំពេញ។

ការឈប់សម្រាក​ក្នុង​ពិធីបុណ្យជាតិនេះ រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ បានរៀបចំរថយន្តចំនួន១១៥គ្រឿង សម្រាប់​បម្រើ​ដល់​ការ​ដឹក​ជញ្ជូន​ពី​រាជ​ធានី​ភ្នំពេញ មកកាន់ខេត្តសៀមរាប និងការដឹកជញ្ជូន ពីខេត្តសៀមរាប ត្រឡប់ទៅរាជ​ធានី​ភ្នំពេញ​វិញទៅតាមពេលវេលា និងទីតាំងចំណតដូចជា ចេញដំណើរពីរាជធានីភ្នំពេញ មកខេត្តសៀមរាប ទីតាំង​ចំណតដីឡូតិ៍តំបន់ OCICជ្រោយចង្វារ (រង្វង់មូលទេពមច្ឆា) រៀងរាល់ម៉ោង០៦៖៣០នាទី ដល់​ម៉ោង១១៖៣០នាទី ចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០២៦ មក​ទី​តាំង​ចំណត​មណ្ឌល​រដ្ឋ​បាលមន្ទីរ ខេត្តសៀមរាប វិថីសម្តេចវិបុលបញ្ញា សុខ អាន (ផ្លូវ៦០ម៉ែត្រ)។

ដោ​យឡែកខេត្ដសៀមរាប ចេញដំណើរពីខេត្តសៀមរាប ទៅរាជធានីភ្នំពេញ តាមពេលវេលា និង​ទី​កន្លែង ចាប់ពីថ្ងៃទី១៣ ដល់ថ្ងៃទី១៧ ខែមេសា ឆ្នាំ២០២៦ ចេញ​ដំណើរ​រៀង​រាល់​ម៉ោង​០៦​៖​៣០​នាទី​ ដល់ម៉ោង១១៖៣០នាទី ។ទីតាំង ចេញដំណើរ មណ្ឌលរដ្ឋបាលមន្ទីរខេត្តសៀមរាប វិថី​សម្តេចវិបុលបញ្ញា សុខ អាន (ផ្លូវ៦០ម៉ែត្រ) ទៅទីតាំងចំណតដីឡូតិ៍តំបន់ OCIC ជ្រោយចង្វារ (រង្វង់មូលទេពមច្ឆា)ភ្នំពេញ។

សូម​បញ្ជាក់ថា ជារៀងរាល់ឆ្នាំ ពិធីបុណ្យភ្ជុំបិណ្ឌ និងពិធីបុណ្យចូលថ្មីប្រពៃណីជាតិខ្មែរ រាជ​រដ្ឋាភិបាល បានគិតគូរខ្ពស់ ដល់ប្រជាពលរដ្ឋ ឱ្យមានការធ្វើដំណើរដោយមិនគិតថ្លៃតាមរយៈរថយន្ដក្រុងរបស់រដ្ឋចេញពីរាជធានីភ្នំពេញ ទៅតាមបណ្ដាខេត្ដផ្សេងៗ ដើម្បីជួយបជុំគ្រួសារ និងកាត់បន្ថយការចំណាយរបស់ពួកគាត់៕