សេតវិមានបានបង្ហើបថាប្រធានាធិបតីអាមេរិកលោក Donald Trump នឹងស្នើសុំឱ្យបណ្ដាប្រទេសអារ៉ាប់ចេញថ្លៃខាតបង់នៃសង្គ្រាមរបស់សហរដ្ឋអាមេរិកប្រឆាំងនឹងអ៊ីរ៉ង់ ដែលត្រូវបានប៉ាន់ប្រមាណថាមានចំនួនរាប់សិបពាន់លានដុល្លារ។

អ្នកនាំពាក្យរបស់លោក Trump គឺលោកស្រី Karoline Leavitt ត្រូវបានសួរកាលពីថ្ងៃចន្ទ៣០មីនាសប្ដាហ៍នេះថា តើបណ្ដារដ្ឋអារ៉ាប់គួរចេញថ្លៃខាតបង់សម្រាប់សង្គ្រាម ដូចនៅពេលដែលសម្ព័ន្ធមិត្តអាមេរិកបានជួយផ្តល់មូលនិធិដល់អន្តរាគមន៍របស់ទីក្រុងវ៉ាស៊ីនតោនអំឡុងសង្គ្រាមឈូងសមុទ្រក្នុងឆ្នាំ ១៩៩០ ដែរឬទេ។

លោកស្រី Leavitt បានប្រាប់ក្រុមអ្នកសារព័ត៌មានថា លោកស្រីគិតថា វាជាអ្វីមួយដែលប្រធានាធិបតីនឹងចាប់អារម្មណ៍យ៉ាងខ្លាំងក្នុងការអំពាវនាវឱ្យពួកគេធ្វើបែបនេះ។

លោកស្រីមិននិយាយមុនសម្ដីចេញពីមាត់លោកប្រធានាធិបតីនោះទេ ប៉ុន្តែវាពិតជាគំនិតមួយដែលលោកស្រីដឹងថាលោក Trump មានបំណង ហើយជាអ្វីមួយដែលលោកស្រីគិតថាអ្នកនឹងឮបន្ថែមទៀតពីមាត់របស់លោក។

សហរដ្ឋអាមេរិកបានដឹកនាំសម្ព័ន្ធភាពសកលនៃប្រទេសរាប់សិបក្នុងអំឡុងសង្គ្រាមឈូងសមុទ្រ ដើម្បីទប់ទល់នឹងការឈ្លានពានរបស់អ៊ីរ៉ាក់លើប្រទេសកូវ៉ែត តាមការស្នើសុំរបស់ប្រទេសនេះ និងប្រទេសជិតខាងអារ៉ាប់មួយចំនួនរបស់ខ្លួន។

ជាថ្នូរមកវិញ រដ្ឋនានាក្នុងតំបន់ និងសមាជិកសម្ព័ន្ធភាព រួមទាំងអាល្លឺម៉ង់ និងជប៉ុន បានរៃអង្គាសប្រាក់បានចំនួន ៥៤ ពាន់លានដុល្លារ ដែលស្មើនឹង ១៣៤ ពាន់លានដុល្លារនាពេលបច្ចុប្បន្ន ដើម្បីជួយការខាតបង់សម្រាប់ការចូលរួមរបស់សហរដ្ឋអាមេរិក៕