កាលពីថ្ងៃចន្ទ (៣០ មីនា) តម្លៃលក់រាយនៃប្រេងសាំងជាមធ្យមនៅទូទាំងសហរដ្ឋអាមេរិក បានហក់ឡើងហួស ៤ ដុល្លារក្នុងមួយហ្គាឡុង ជាលើកដំបូងបំផុតក្នុងរយៈពេលជាងបីឆ្នាំមកនេះ នេះបើយោងតាមទិន្នន័យពីសេវាកម្មតាមដានតម្លៃ GasBuddy ខណៈសង្គ្រាមរវាងអាមេរិក-អ៊ីស្រាអែល ជាមួយអ៊ីរ៉ង់ នៅតែបន្តធ្វើឱ្យកក្រើកទីផ្សារថាមពលសកល។

កម្រិតតម្លៃ ៤ ដុល្លារក្នុងមួយហ្គាឡុងនេះ ត្រូវបានមើលឃើញលើកចុងក្រោយគឺកាលពីខែសីហា ឆ្នាំ ២០២២ បន្ទាប់ពីប្រតិបត្តិការយោធារបស់រុស្ស៊ីលើអ៊ុយក្រែន ហើយតម្លៃនេះត្រូវបានអ្នកវិភាគមួយចំនួនចាត់ទុកថាជា «របាំងផ្លូវចិត្ត» សម្រាប់អ្នកប្រើប្រាស់។ តម្លៃទំនិញជាច្រើនកំពុងកើនឡើង រួមទាំងប្រេងឆៅដែលប្រើសម្រាប់ផលិតប្រេងសាំងផងដែរ បន្ទាប់ពីអ៊ីរ៉ង់ បិទច្រកសមុទ្រហ័រមូសដ៏សំខាន់។

ការហក់ឡើងនៃតម្លៃប្រេងឥន្ធនៈបានចាប់ផ្តើមដាក់បន្ទុកលើហិរញ្ញវត្ថុរបស់ក្រុមគ្រួសារអាមេរិក ដែលកំពុងប្រឈមនឹងកំណើនថ្លៃចំណាយប្រចាំថ្ងៃស្រាប់ទៅហើយ។ បញ្ហានេះក៏ក្លាយជារឿងដ៏ឈឺក្បាលផ្នែកនយោបាយសម្រាប់លោកប្រធានាធិបតី Donald Trump និងគណបក្សសាធារណរដ្ឋរបស់លោក មុនការបោះឆ្នោតពាក់កណ្តាលអាណត្តិនៅខែវិច្ឆិកា ខាងមុខ ខណៈដែលពួកគេកំពុងធ្វើយុទ្ធនាការដើម្បីរក្សាអាសនៈភាគច្រើនដ៏ស្ដួចស្ដើងរបស់ខ្លួននៅក្នុងសភាអាមេរិក។

លោក Trump កាលពីមុនបានប្តេជ្ញាថានឹងបញ្ចុះតម្លៃថាមពល និងបង្កើនការផលិតប្រេង និងឧស្ម័ននៅក្នុងសហរដ្ឋអាមេរិក។ ប៉ុន្តែមកទល់ពេលនេះ អាណត្តិទីពីររបស់លោកភាគច្រើន ពោរពេញដោយភាពមិនច្បាស់លាស់នៃទីផ្សារ ចលាចលភូមិសាស្ត្រនយោបាយ និងការផ្លាស់ប្តូរគោលនយោបាយលើបញ្ហានានាដូចជាពន្ធគយជាដើម។ ជារួម តម្លៃលក់រាយនៃប្រេងសាំងជាមធ្យមនៅអាមេរិក បានកើនឡើងប្រហែល ១,០៦ ដុល្លារក្នុងមួយហ្គាឡុង ឬស្មើនឹង ៣៦% ចាប់តាំងពីសហរដ្ឋអាមេរិក និងអ៊ីស្រាអែល បានវាយប្រហារលើអ៊ីរ៉ង់នៅចុងខែកុម្ភៈមក៕