នៅថ្ងៃអង្គារ (៣១ មីនា) នេះ អូស្ត្រាលីគំរាមថា ខ្លួននឹងប្តឹងក្រុមហ៊ុនប្រព័ន្ធផ្សព្វផ្សាយសង្គមខ្នាតយក្សជាច្រើន ពីបទបំពានលើបម្រាមបណ្ដាញសង្គមលើអ្នកដែលមានអាយុក្រោម ១៦ឆ្នាំ ខណៈនិយតករអ៊ីនធឺណិតរបស់ប្រទេសនេះបានបញ្ជាក់ថា ខ្លួនកំពុងស៊ើបអង្កេតវេទិកាធំៗមួយចំនួន ចំពោះការសង្ស័យថា អាចមានការរំលោភលើបម្រាម ដែលជាសញ្ញាបង្ហាញថា ក្រុមហ៊ុនទាំងនោះអាចនឹងប្រឈមចំណាត់ការច្បាប់ ក្រោមប្រព័ន្ធគ្រប់គ្រងដំបូងគេបង្អស់នៅលើពិភពលោក។

សេចក្ដីប្រកាសនេះគឺជាការវាយតម្លៃជាសាធារណៈលើកដំបូងរបស់រដ្ឋាភិបាល ចំពោះការអនុលោមតាមច្បាប់ ដែលកំពុងត្រូវបានសិក្សាដោយអ្នករៀបចំគោលនយោបាយនៅទូទាំងសកលលោក។ ការអនុវត្តមិនបានខ្ជាប់ខ្ជួនដោយបណ្តាញសង្គមធំៗទាំងនេះ អាចនឹងប៉ះពាល់ដល់ដំណើរការរបស់រដ្ឋាភិបាលនៃប្រទេសដទៃទៀត ដែលកំពុងពិចារណាលើការដាក់កម្រិតស្រដៀងគ្នានេះ។

ស្នងការទទួលបន្ទុកសុវត្ថិភាពអ៊ីនធឺណិត លោកស្រី Julie Inman Grant បាននិយាយថា បណ្តាញសង្គម Facebook និង Instagram របស់ក្រុមហ៊ុន Meta ក៏ដូចជាក្រុមហ៊ុន Snapchat ក្រុមហ៊ុន TikTok និងកម្មវិធី YouTube របស់ក្រុមហ៊ុន Google ត្រូវបានកត់សម្គាល់ថា អាចនឹងមិនបានអនុលោមតាមច្បាប់ ហើយស្ថាប័នត្រួតពិនិត្យកំពុងប្រមូលភស្តុតាងសម្រាប់លទ្ធភាពនៃការដាក់ពិន័យ ដោយសេចក្ដីសម្រេចនឹងត្រូវធ្វើឡើងនៅពាក់កណ្តាលឆ្នាំនេះ។

ក្រោមច្បាប់របស់អូស្ត្រាលី បណ្តាញសង្គមនានាប្រឈមនឹងការផាកពិន័យរហូតដល់ ៤៩,៥ លានដុល្លារអូស្ត្រាលី (ប្រហែល ៣៤ លានដុល្លារអាមេរិក) ចំពោះការមិនអនុលោមតាមបម្រាម។ ក្រុមហ៊ុន Meta និង Snap បាននិយាយថា ពួកគេប្តេជ្ញាអនុលោមតាមបម្រាមនេះ ខណៈអ្នកនាំពាក្យរបស់ក្រុមហ៊ុន Meta បានបន្ថែមថា ការសាកល្បងបច្ចេកវិទ្យាបញ្ជាក់អាយុរបស់រដ្ឋាភិបាលផ្ទាល់ ក៏បានរកឃើញថាមាន «កម្រិតលម្អៀងពីធម្មជាតិ» ជុំវិញការកំណត់អាយុ ១៦ ឆ្នាំនេះដែរ៕