មូលនិធិរូបិយវត្ថុអន្តរជាតិ IMF បានចេញការព្រមានជាថ្មីម្ដងទៀតកាលពីថ្ងៃចន្ទ (៣០ មីនា) ថា សង្គ្រាមដ៏ក្ដៅគគុកនៅតំបន់មជ្ឈិមបូព៌ា បានបង្កឱ្យមានការរំខានយ៉ាងធ្ងន់ធ្ងរដល់សេដ្ឋកិច្ចនៃបណ្តាប្រទេសជួរមុខនានា ហើយកំពុងធ្វើឱ្យចក្ខុវិស័យនៃសេដ្ឋកិច្ចជាច្រើន ដែលទើបតែចាប់ផ្តើមងើបឡើងវិញពីវិបត្តិមុនៗ មានភាពស្រអាប់ទៅវិញ។

នៅក្នុងអត្ថបទប្លុក ដែលចេញផ្សាយដោយក្រុមសេដ្ឋវិទូជាន់ខ្ពស់ IMF ស្ថាប័នផ្តល់កម្ចីសកលមួយនេះបានលើកឡើងថា សង្គ្រាមដែលបង្កឡើងដោយការវាយប្រហាររបស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ កាលពីថ្ងៃទី២៨ ខែកុម្ភៈ កន្លងទៅ កំពុងបង្កឱ្យមានផលប៉ះពាល់ជាសកល ប៉ុន្តែក្នុងកម្រិតខុសៗគ្នាទៅតាមតំបន់ ហើយកំពុងនាំឱ្យស្ថានភាពហិរញ្ញវត្ថុកាន់តែតឹងតែង។

យោងតាមទីភ្នាក់ងារថាមពលអន្តរជាតិ (IEA) ការបិទច្រកសមុទ្រហ័រមូសដោយអ៊ីរ៉ង់ និងការខូចខាតដល់ហេដ្ឋារចនាសម្ព័ន្ធក្នុងតំបន់ បានបង្កការរំខានដ៏ធំបំផុតក្នុងប្រវត្តិសាស្ត្រដល់ទីផ្សារប្រេងសកល ដោយសារតែជាធម្មតាលំហូរចន្លោះ ២៥% ទៅ ៣០% នៃប្រេងសកល និងអត្រា ២០% នៃឧស្ម័នធម្មជាតិរាវ ត្រូវបានដឹកជញ្ជូនឆ្លងកាត់ផ្លូវទឹកដ៏តូចចង្អៀតមួយនេះ។

IMF បានបញ្ជាក់ថា ផលប៉ះពាល់នៃសង្គ្រាមនឹងអាស្រ័យទៅលើរយៈពេលដែលជម្លោះនឹងអូសបន្លាយ ហើយតើជម្លោះនឹងរីករាលដាលដល់កម្រិតណា និងទំហំនៃការខូចខាតប៉ុនណាដែលភាពតានតឹងនេះបង្កឡើងលើហេដ្ឋារចនាសម្ព័ន្ធ និងខ្សែច្រវាក់ផ្គត់ផ្គង់ ដោយបានជំរុញឱ្យបណ្តាប្រទេសនានាធ្វើការពិចារណាឱ្យបានហ្មត់ចត់លើរាល់វិធានការទាំងឡាយក្នុងការគ្រប់គ្រងវិបត្តិនេះ។

សេចក្តីថ្លែងការណ៍របស់ IMF បានធ្វើឡើងស្របពេលដែលប្រមុខហិរញ្ញវត្ថុមកពីក្រុមប្រទេសសេដ្ឋកិច្ចជឿនលឿនទាំងប្រាំពីរ G7 បាននិយាយថា ពួកគេត្រៀមខ្លួនរួចជាស្រេចក្នុងការចាត់ «វិធានការចាំបាច់ទាំងអស់» ដើម្បីការពារស្ថិរភាពទីផ្សារថាមពល និងកាត់បន្ថយផលប៉ះពាល់សេដ្ឋកិច្ចឱ្យបានកាន់តែទូលំទូលាយពីភាពប្រែប្រួលនាពេលថ្មីៗនេះ៕