ប្រមុខហិរញ្ញវត្ថុមកពីក្រុមប្រទេសដែលមានសេដ្ឋកិច្ចជឿនលឿនទាំងប្រាំពីរ ឬហៅថាក្រុមប្រទេស G7 បានប្រកាសកាលពីថ្ងៃចន្ទ (៣០ មីនា) ថា ពួកគេត្រៀមខ្លួនជាស្រេចក្នុងការចាត់ «វិធានការចាំបាច់ទាំងអស់» ដើម្បីការពារស្ថិរភាពទីផ្សារថាមពលសកល និងកាត់បន្ថយផលប៉ះពាល់សេដ្ឋកិច្ចឱ្យបានកាន់តែទូលំទូលាយពីភាពប្រែប្រួលនាពេលថ្មីៗនេះ។

រដ្ឋមន្ត្រីក្រសួងហិរញ្ញវត្ថុ និងថាមពល រួមជាមួយទេសាភិបាលធនាគារកណ្តាលមកពីក្រុម G7 ដែលរួមមាន សហរដ្ឋអាមេរិក កាណាដា ជប៉ុន ចក្រភពអង់គ្លេស បារាំង អាល្លឺម៉ង់ និងអ៊ីតាលី បានធ្វើសន្និសីទតាមអនឡាញដើម្បីសម្របសម្រួលសកម្មភាពផ្ដល់ស្ថិរភាពជាសកល ខណៈសង្គ្រាមនៅអ៊ីរ៉ង់ កំពុងរំខានដល់ទីផ្សារថាមពលពិភពលោក។

ក្នុងសេចក្តីថ្លែងការណ៍មួយបន្ទាប់ពីកិច្ចប្រជុំដែលរៀបចំដោយបារាំង ដែលជាប្រធានប្តូរវេននៃក្រុមនេះសម្រាប់ឆ្នាំនេះ G7 បានបញ្ជាក់ថា៖ «ខ្លួនត្រៀមរួចជាស្រេចហើយ ក្នុងការចាត់វិធានការចាំបាច់ទាំងអស់ ដោយមានការសម្របសម្រួលយ៉ាងជិតស្និទ្ធជាមួយដៃគូរបស់ខ្លួន រួមទាំងការរក្សាស្ថិរភាព និងសន្តិសុខនៃទីផ្សារថាមពល»។

គួរឱ្យដឹងថា សមាជិកទាំង ៣២ប្រទេស នៃទីភ្នាក់ងារថាមពលអន្តរជាតិ (IEA) បានឯកភាពគ្នាកាលពីដើមខែនេះ ក្នុងការបញ្ចេញប្រេងក្នុងកម្រិតកំណត់ត្រាចំនួន ៤០០ លានបារ៉ែល ពីឃ្លាំងបម្រុងយុទ្ធសាស្ត្រ ដើម្បីទប់ស្កាត់ការហក់ឡើងនៃតម្លៃប្រេងឆៅសកល។

ក្រុម G7 លើកឡើងថា ខ្លួនគាំទ្រដល់កិច្ចប្រឹងប្រែងដើម្បីរក្សាលំហូរផ្គត់ផ្គង់ថាមពល និងបានកត់សម្គាល់ពីជម្រើសរបស់ IEA ក្នុងការគ្រប់គ្រងតម្រូវការតាមស្ថានភាពជាក់ស្តែងនៃប្រទេសនីមួយៗ។ ក្រុមនេះក៏អំពាវនាវដល់បណ្តាប្រទេសនានា «ឱ្យបញ្ឈប់ការដាក់កម្រិតលើការនាំចេញដែលមិនសមហេតុផល» លើប្រេង ឧស្ម័ន និងផលិតផលដែលពាក់ព័ន្ធផងដែរ៕