អង្គការណាសា កំពុងត្រៀមលក្ខណៈបញ្ចូនអវកាសយានិកក្រុមដំបូងទៅកាន់ឋានព្រះចន្ទ ក្នុងពេលជាង ៥៣ឆ្នាំមកនេះ តាមរយៈបេសកកម្មឈ្មោះថា Artemis ទីពីរ។ នេះគឺជាការហោះហើរសាកល្បងដ៏សំខាន់មួយក្នុងគោលដៅឋានព្រះចន្ទដ៏ទូលំទូលាយរបស់មនុស្សជាតិ ខណៈសហរដ្ឋអាមេរិក កំពុងប្រជែងដើម្បីបញ្ជាក់ពីភាពជាអ្នកដឹកនាំក្នុងលំហអាកាសឡើងវិញ ទល់នឹងភាពជឿនលឿនកាន់តែខ្លាំងក្លារបស់ចិន។

អវកាសយានិកអាមេរិក ៣រូប និងកាណាដា ១រូប គ្រោងនឹងជិះយាន Orion នៅលើប្រព័ន្ធបាញ់រ៉ូកែត Space Launch System នៅថ្ងៃពុធ ទី១ ខែមេសា ស្អែកនេះ សម្រាប់បេសកកម្មសាកល្បងរយៈពេល ១០ថ្ងៃ ដោយហោះហើរជុំវិញឋានព្រះចន្ទ រួចត្រឡប់មកផែនដីវិញ។ នេះគឺជាដំណើរដ៏វែងឆ្ងាយដែលនាំពួកគេទៅកាន់ទីអវកាសកាន់តែជ្រៅ ជាងអ្វីដែលមនុស្សជាតិធ្លាប់បានទៅដល់ពីមុនមក។

បេសកកម្មនេះ គឺជាការហោះហើរសាកល្បងដែលមានមនុស្សជិះដំបូងគេក្នុងកម្មវិធី Artemis របស់ណាសា ដែលជាកិច្ចប្រឹងប្រែងចម្បងរបស់អាមេរិក ក្នុងការចាប់ផ្តើមបេសកកម្មហោះហើរទៀងទាត់ទៅកាន់ឋានឋានព្រះចន្ទ ជាមួយនឹងការចំណាយដែលត្រូវបានប៉ាន់ប្រមាណថា អស់យ៉ាងតិច ៩៣ ពាន់លានដុល្លារ ចាប់តាំងពីឆ្នាំ២០១២មក។ គិតចាប់តាំងពីបេសកកម្ម អាប៉ូឡូ១៧ ក្នុងឆ្នាំ១៩៧២ មក មិនទាន់មានមនុស្សចុះចតលើផ្ទៃព្រះចន្ទនៅឡើយទេ ដែលនេះគឺជាសមិទ្ធផលដ៏លំបាកមួយដែលណាសា មានបំណងធ្វើឱ្យបានម្តងទៀតនៅឆ្នាំ២០២៨ នៅតំបន់ប៉ូលខាងត្បូងនៃឋានព្រះចន្ទ។

នាពេលថ្មីៗនេះ មន្ត្រីអាមេរិកបានផ្តោតការយកចិត្តទុកដាក់ទៅលើចិន ដែលជាគូប្រជែងបច្ចេកវិទ្យាដ៏ខ្លាំងក្លា ខណៈទីក្រុងប៉េកាំង មានការរីកចម្រើនជាលំដាប់នៅក្នុងកម្មវិធីឋានព្រះចន្ទរបស់ខ្លួនក្នុងប៉ុន្មានឆ្នាំចុងក្រោយនេះ តាមរយៈការចុះចតដោយយានជាបន្តបន្ទាប់ និងមានគោលដៅបញ្ជូនក្រុមអវកាសយានិកផ្ទាល់ខ្លួនទៅលើផ្ទៃព្រះចន្ទនៅឆ្នាំ២០៣០៕