មន្ត្រីឥណ្ឌាជាង ៣លាននាក់ នឹងចំណាយពេលមួយឆ្នាំដើម្បីរាប់ចំនួនមនុស្សគ្រប់រូបនៅក្នុងប្រទេសឥណ្ឌា ដែលជាប្រទេសមានប្រជាជនច្រើនជាងគេបំផុតនៅលើពិភពលោក នៅក្នុងភារកិច្ចដ៏ធំសម្បើមមួយ បន្ទាប់ពីមានការពន្យារពេលដោយសារតែជំងឺរាតត្បាតកូវីដ-១៩។

រដ្ឋាភិបាលបានឱ្យដឹងកាលពីថ្ងៃចន្ទ (៣០ មីនា) ថា ដំបូងឡើយ កិច្ចការស្រង់ចំនួនប្រជាជនដែលធ្វើឡើងក្នុងរយៈពេល ១០ឆ្នាំម្តងនេះ ធ្លាប់កំណត់ពេលធ្វើឡើងក្នុងឆ្នាំ២០២១ ប៉ុន្តែត្រូវបានព្យារពេល។ ដំណើរការជំរឿននឹងចាប់ផ្តើមឡើងវិញនៅថ្ងៃទី១ ខែមេសា ឆ្នាំ២០២៦នេះ ជាមួយនឹងរយៈពេលដ៏ខ្លីមួយសម្រាប់ប្រជាពលរដ្ឋដែលចង់ចុះឈ្មោះតាមប្រព័ន្ធអនឡាញដោយខ្លួនឯង។

លោក Mritunjay Kumar Narayan ស្នងការជំរឿន បានប្រាប់អ្នកយកព័ត៌មានថា បន្ទាប់ពីការចុះឈ្មោះតាមប្រព័ន្ធអនឡាញចប់ នឹងមានការចុះស្រង់ចំនួនមនុស្សដោយផ្ទាល់តាមផ្ទះអ្នកស្រុក ចំនួនពីរដំណាក់កាល។ ដំណាក់កាលទីមួយ នឹងធ្វើបញ្ជីឈ្មោះក្រុមគ្រួសារ និងស្ថានភាពលំនៅឋាន ហើយដំណាក់កាលទីពីរ គឺជំរឿនអ្នករស់នៅ ព្រមទាំងស្ថានភាពសេដ្ឋកិច្ច និងសង្គមរបស់ពួកគេ។

យោងតាមមូលនិធិប្រជាជននៃអង្គការសហប្រជាជាតិ (UNFPA) បានឱ្យដឹងថា ឥណ្ឌាមានប្រជាជនលើសពី ១,៤ ពាន់លាននាក់ ដែលបានវ៉ាដាច់ចិន ក្នុងឆ្នាំ២០២៣។ រដ្ឋាភិបាលឥណ្ឌា បានចាត់ទុកចំនួនប្រជាជនវ័យក្មេងដ៏ច្រើនលើសលប់របស់ខ្លួនថា ជាឱកាសមួយក្នុងការបង្កើតកម្លាំងពលកម្មជំនាញដ៏ធំសម្បើម ខណៈប្រទេសដែលមានសេដ្ឋកិច្ចធំៗជាច្រើនទៀត កំពុងជួបការលំបាកជាមួយនឹងការថយចុះនៃកម្លាំងពលកម្ម និងកំណើននៃចំនួនប្រជាជនវ័យចំណាស់៕