រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergei Lavrov) កាលពីថ្ងៃចន្ទ បានអំពាវនាវឲ្យមានបទឈប់បាញ់ជាបន្ទាន់ និងដំណោះស្រាយនយោបាយចំពោះភាពតានតឹងដែលកំពុងកើនឡើង នៅក្នុងតំបន់ឈូងសមុទ្រពែក្ស ក្នុងអំឡុងពេលសន្និសីទតាមវីដេអូជាមួយសមភាគីមកពីរដ្ឋអារ៉ាប់ឈូងសមុទ្រ។ នេះបើយោងតាមក្រសួងការបរទេសរុស្ស៊ី។

លោក ឡាវរ៉ូវ បានកត់សម្គាល់ថា ជម្លោះដែលមូលហេតុចម្បង គឺការឈ្លានពានដែលគ្មានការបង្កហេតុ និងគ្មានន័យរបស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ គួរតែត្រូវបានដោះស្រាយតាមរយៈមធ្យោបាយនយោបាយ និងការទូត ដោយពិចារណាយ៉ាងពេញលេញអំពីផលប្រយោជន៍ស្របច្បាប់របស់រដ្ឋទាំងអស់ នៅក្នុងតំបន់។

រុស្ស៊ីបានកត់សម្គាល់ពីភាពមិនអាចទទួលយកបាននៃការធ្វើឲ្យប្រទេសទាំងនេះ ចូលទៅក្នុងសង្គ្រាម និងវាយប្រហារហេដ្ឋារចនាសម្ព័ន្ធស៊ីវិលរបស់ពួកគេ រួមទាំងថាមពល និងគ្រឿងបរិក្ខារសំខាន់ៗផ្សេងទៀត។

លោក ឡាវរ៉ូវ បានបន្ថែមថា ទីក្រុងមូស្គូប្តេជ្ញារក្សាការសម្របសម្រួលយ៉ាងជិតស្និទ្ធជាមួយប្រទេសអារ៉ាប់ ដើម្បីសម្រួលដល់បទឈប់បាញ់ឲ្យបានឆាប់រហ័ស និងទប់ស្កាត់ការរីករាលដាលនៃជម្លោះនេះ។

លោករដ្ឋមន្ត្រីការបរទេស ក៏បាននិយាយផងដែរថា យន្តការច្បាស់លាស់ ត្រូវតែដាក់ឲ្យដំណើរការ ដើម្បីរក្សាកិច្ចសហប្រតិបត្តិការក្នុងចំណោមប្រទេសទាំងអស់នៅក្នុងតំបន់ និងដើម្បីធានាបាននូវស្ថិរភាពយូរអង្វែង នៅមជ្ឈិមបូព៌ា៕