ក្នុងកិច្ចប្រជុំត្រៀមលក្ខណៈកម្រិតតំបន់របស់សភាអាយប៉ា (AIPA) នាទីក្រុងហ្សាការតា ប្រទេសឥណ្ឌូនេស៊ី កាលពីថ្ងៃទី៣០ ខែមីនា ឆ្នាំ២០២៦ម្សិលមិញនេះ រដ្ឋសភាកម្ពុជាបានបង្ហាញនូវការប្តេជ្ញាចិត្តខ្ពស់ក្នុងការរួមចំណែកដោះស្រាយវិបត្តិអត់ឃ្លាន និងកង្វះអាហារូបត្ថម្ភ សំដៅត្រៀម  លក្ខណៈសម្រាប់កិច្ចប្រជុំកំពូលសភាសកលលើកទី៣ ដែលនឹងប្រព្រឹត្តទៅនៅប្រទេសអាហ្វ្រិកខាងត្បូង នាខែមិថុនា ខាងមុខ។

ឯកឧត្តម ប៉ាន សូរស័ក្តិ លេខាធិការគណៈកម្មការទី៩ នៃរដ្ឋសភា បានអញ្ជើញចូលរួមកិច្ចប្រជុំនេះ ដែលរៀបចំឡើងដោយលេខាធិការដ្ឋានអាយប៉ា សហការជាមួយអង្គការស្បៀង និងកសិកម្មនៃអង្គការសហប្រជាជាតិ (FAO)។ កិច្ចប្រជុំនេះមានគោលដៅយុទ្ធសាស្ត្រក្នុងការផ្លាស់ប្តូរបទពិសោធន៍ និងពង្រឹងកិច្ចសហប្រតិបត្តិការសភាក្នុងតំបន់អាស៊ាន លើបញ្ហាសន្តិសុខស្បៀង។

ក្នុងបទអន្តរាគមន៍ដ៏មានសារៈសំខាន់ ឯកឧត្តម ប៉ាន សូរស័ក្តិ បានលើកឡើងនូវសសរស្តម្ភយុទ្ធសាស្ត្រចំនួន ៣ ដែលកម្ពុជាកំពុងយកចិត្តទុកដាក់៖

• ការធានាសិទ្ធិទទួលបានស្បៀង៖

តាមរយៈការជំរុញការអភិវឌ្ឍប្រកបដោយបរិយាបន្ន និងយុត្តិធម៌សង្គម ដើម្បីឱ្យប្រជាពលរដ្ឋគ្រប់រូបមានលទ្ធភាពទទួលបានអាហារូបត្ថម្ភគ្រប់គ្រាន់។

• ការកសាងប្រព័ន្ធកសិ-ចំណីអាហារដែលមានភាពធន់៖ ផ្តោតលើប្រសិទ្ធភាព និងចីរភាព ដើម្បីឆ្លើយតបទៅនឹងការប្រែប្រួលអាកាសធាតុ និងវិបត្តិនានា។

• ការលើកកម្ពស់សុខភាពសាធារណៈ៖ ជំរុញការបរិភោគរបបអាហារដែលមានសុខភាពល្អ និងសុវត្ថិភាពម្ហូបអាហារ តាមរយៈយន្តការច្បាប់ និងគោលនយោបាយជាតិដែលកំពុងអនុវត្តយ៉ាងសកម្មនៅកម្ពុជា។

តាមរយៈកិច្ចប្រជុំនេះ ក៏មានការពិភាក្សាលើ «សេចក្តីព្រាងសំណើរបាយការណ៍សកល» ដែលជាយន្តការថ្មីមួយអនុញ្ញាតឱ្យសភាជាតិនៃប្រទេសនីមួយៗ រាយការណ៍ពីវឌ្ឍនភាពនៃការប្តេជ្ញាចិត្តរបស់ខ្លួន។ យន្តការនេះនឹងជួយពង្រឹងនូវគណនេយ្យភាព តម្លាភាព និងការចែករំលែកមេរៀនជោគជ័យរវាងប្រទេសជាសមាជិកអាយប៉ាទាំងអស់ផងដែរ។

កិច្ចប្រជុំបានបញ្ចប់ទៅដោយជោគជ័យ ជាមួយការប្តេជ្ញាចិត្តរួមគ្នារបស់បណ្ដាប្រទេសសមាជិក រួមមាន កម្ពុជា ឥណ្ឌូនេស៊ី ឡាវ ម៉ាឡេស៊ី ហ្វីលីពីន ថៃ វៀតណាម និងទីម័រឡេស្តេ ជាដើម ក្នុងការឈរជាធ្លុងមួយដើម្បីលុបបំបាត់ភាពអត់ឃ្លាន និងកង្វះអាហារូបត្ថម្ភ មិនត្រឹមតែក្នុងតំបន់ប៉ុណ្ណោះទេ ប៉ុន្តែក្នុងកម្រិតសកលលោកទាំងមូល៕