នៅថ្ងៃអង្គារ (ទី៣១ ខែមីនា ឆ្នាំ២០២៦) នេះ ប្រទេសកូរ៉េខាងត្បូងបានស្នើថវិការដ្ឋាភិបាលបន្ថែមចំនួន ១៧,៣ពាន់លានដុល្លារ ដើម្បីគាំទ្រដល់អ្នកប្រើប្រាស់ និងក្រុមហ៊ុនដែលរងផលប៉ះពាល់ ដោយសារសង្គ្រាម នៅតំបន់មជ្ឈិមបូព៌ា។

តម្លៃប្រេងឡើងខ្ពស់ដែលបង្កឡើងដោយសារសង្គ្រាម រវាងសហរដ្ឋអាមេរិក និងអ៊ីស្រាអែល លើអ៊ីរ៉ង់ បានបង្កើនហានិភ័យ ចំពោះកំណើន និងអតិផរណា សម្រាប់សេដ្ឋកិច្ចធំទី៤ របស់តំបន់អាស៊ីមួយនេះ ដែលក៏ជាប្រទេសនាំចូលប្រេងធំជាងគេទី៤ របស់ពិភពលោកផងដែរ ដោយ ៧០ភាគរយនៃការទិញរបស់ខ្លួនគឺទៅពីតំបន់មជ្ឈិមបូព៌ា។

នេះគឺជាថវិកាបន្ថែមលើកទី២ ក្នុងរយៈពេលមិនដល់មួយឆ្នាំផង ក្រោមរដ្ឋបាលរបស់ប្រធានាធិបតីកូរ៉េខាងត្បូង លោក Lee Jae Myung ដែលបានសន្យាថា នឹងបន្តគោលនយោបាយសារពើពន្ធពង្រីក ដើម្បីជំរុញកំណើនសេដ្ឋកិច្ច ចាប់តាំងពីបានចូលកាន់តំណែងក្នុងខែមិថុនា ឆ្នាំ២០២៥។

រដ្ឋមន្ត្រីហិរញ្ញវត្ថុ លោក Park Hong-keun បាននិយាយថា៖ «ក្រៅពីទិន្នន័យសេដ្ឋកិច្ច ការលំបាក និងកង្វល់ដែលប្រជាជន និងក្រុមហ៊ុនរបស់យើងមាន គឺកាន់តែខ្លាំងឡើងៗជាងពេលណាៗទាំងអស់។ ការឆ្លើយតបជាមុន គឺសំខាន់ជាងអ្វីផ្សេងទៀត»។

យោងតាមក្រសួងហិរញ្ញវត្ថុ បានឲ្យដឹងថា ផែនការចំណាយចំនួន ២៦,២សែនកោដិវ៉ុន (១៧,៣ពាន់លានដុល្លារ) រួមមានវិធានការ ១០,១សែនកោដិវ៉ុន ជារការឆ្លើយតបទៅនឹងតម្លៃប្រេងឡើងខ្ពស់ ការគាំទ្រ ២,៨សែនកោដិវ៉ុន សម្រាប់អ្នកមានប្រាក់ចំណូលទាប និងយុវជន ហើយ ២,៦សែនកោដិវ៉ុន សម្រាប់ក្រុមហ៊ុនដែលរងផលប៉ះពាល់ដោយជម្លោះ នៅតំបន់មជ្ឈិមបូព៌ា។

ថវិកាបន្ថែមនេះនឹងបង្កើនការចំណាយសរុបរបស់រដ្ឋាភិបាលសម្រាប់ឆ្នាំ២០២៦ ដល់ចំនួន ៧៥២,១សែនកោដិវ៉ុន ដោយកើនឡើង ១១,៨ភាគរយ ធៀបនឹងឆ្នាំមុន ដែលជំរុញកំណើនសេដ្ឋកិច្ច ០,២ភាគរយ។ មុនសង្គ្រាមផ្ទុះឡើង រដ្ឋាភិបាលបានគ្រោងចំណាយ ៧២៧,៩សែនកោដិវ៉ុន៕