លោក Scott Ritter អតីតអ្នកវិភាគចារកម្មកងម៉ារីនអាមេរិក និងជាអតីតអ្នកត្រួតពិនិត្យអាវុធអង្គការសហប្រជាជាតិប្រចាំប្រទេសអ៊ីរ៉ាក់ បានប្រាប់សារព័ត៌មាន TASS ក្នុងបទសម្ភាសន៍មួយថា រុស្ស៊ីគឺជាប្រទេសតែមួយគត់ ដែលមានសមត្ថភាពចុះហត្ថលេខាលើ «កិច្ចព្រមព្រៀងដ៏អស្ចារ្យ» ដើម្បីផ្សះផ្សាភាគីជម្លោះនៅមជ្ឈិមបូព៌ា។  

លោកបាននិយាយថា៖«រុស្ស៊ីមានទំនាក់ទំនងការទូត។ តើរុស្ស៊ីអាចនិយាយជាមួយអ្នកណាខ្លះ? សហរដ្ឋអាមេរិក។ ប្រធានាធិបតីរុស្ស៊ី លោក វ្ល៉ាឌីមៀ ពូទីន និង ប្រធានាធិបតីអាមេរិក លោក ដូណាល់ ត្រាំ និយាយគ្នាទៅវិញទៅមក។ រុស្ស៊ីនិយាយជាមួយអ៊ីស្រាអែល។ រុស្ស៊ីជាសម្ព័ន្ធមិត្តរបស់អ៊ីរ៉ង់។ រុស្ស៊ីមានទំនាក់ទំនងល្អជាមួយរដ្ឋអារ៉ាប់ឈូងសមុទ្រ។ ទាំងនេះ គឺជាភាគីទាំងអស់នៃជម្លោះ។ រុស្ស៊ីគឺជាប្រទេសតែមួយដែលអាចនិយាយជាមួយពួកគេទាំងអស់បាន។ ដូច្នេះប្រសិនបើអ្នកចង់បានដំណោះស្រាយដ៏ប្រសើរនោះ មានតែរុស្ស៊ីចូលរួម ហើយធ្វើកិច្ចព្រមព្រៀងដ៏អស្ចារ្យបាន»។  

តាមគំនិតរបស់លោក លោក ត្រាំ អាចជួយបញ្ចប់ជម្លោះនៅអ៊ុយក្រែនតាមលក្ខខណ្ឌដែលអាចទទួលយកបានដោយរុស្ស៊ីជាថ្នូរនឹងជំនួយជាមួយអ៊ីរ៉ង់។ លោកបានបន្ថែមថា៖ «យើងមិនចាំបាច់រៀបរាប់លម្អិតអំពីរូបរាងនៃកិច្ចព្រមព្រៀងដ៏អស្ចារ្យនោះទេ។ ប៉ុន្តែយើងត្រូវទទួលស្គាល់ថា មានសក្តានុពលនៃកិច្ចព្រមព្រៀងដ៏អស្ចារ្យ ហើយរុស្ស៊ី គឺជាប្រទេសដែលអាចសម្រេចបាន»។

នៅថ្ងៃទី ២៨ ខែកុម្ភៈ សហរដ្ឋអាមេរិក និងអ៊ីស្រាអែល បានចាប់ផ្តើមសង្គ្រាមប្រឆាំងនឹងអ៊ីរ៉ង់ ដោយវាយប្រហារទីក្រុងធំៗ រួមទាំងទីក្រុងតេអេរ៉ង់ផងដែរ។ កងឆ្មាំបដិវត្តន៍ឥស្លាម បានសងសឹកដោយការវាយប្រហារយ៉ាងខ្លាំងក្លាទៅលើអ៊ីស្រាអែល។ មូលដ្ឋានយោធាអាមេរិកនៅបារ៉ែន ហ្ស៊កដានី អ៊ីរ៉ាក់ កាតា គូវ៉ែត អេមីរ៉ាតអារ៉ាប់រួម និងអារ៉ាប៊ីសាអ៊ូឌីត ក៏ត្រូវបានវាយប្រហារផងដែរ។ មេដឹកនាំកំពូលលោក Ayatollah Ali Khamenei និងឥស្សរជនសំខាន់ៗមួយចំនួនទៀតរបស់អ៊ីរ៉ង់ ត្រូវបានសម្លាប់៕