ដោយបញ្ជាក់ពីរបាយការណ៍របស់សារព័ត៌មាន ប្រភពមួយដែលដឹងពីបញ្ហានេះ បាននិយាយនៅថ្ងៃអង្គារ (ទី៣១ ខែមីនា ឆ្នាំ២០២៦) នេះថា ប្រទេសអ៊ីតាលីបានបដិសេធមិនអនុញ្ញាតឲ្យយន្តហោះយោធាអាមេរិកចុះចត នៅមូលដ្ឋានទ័ពអាកាស Sigonella នៅលើកោះ Sicily មុនពេលហោះហើរទៅកាន់តំបន់មជ្ឈិមបូព៌ា។

សារព័ត៌មានចុះផ្សាយប្រចាំថ្ងៃ Corriere della Sera បានរាយការណ៍ថា «យន្តហោះទម្លាក់គ្រាប់បែកអាមេរិកមួយចំនួន» ត្រូវបានគ្រោងចុះចតនៅមូលដ្ឋាន ភាគខាងកើតកោះ Sicily មុនពេលធ្វើដំណើរទៅកាន់តំបន់មជ្ឈិមបូព៌ា។ តែសារព័ត៌មាននេះ មិនបានបញ្ជាក់ថា ពេលណាយន្តហោះទាំងនោះត្រូវចុះចតនោះទេ។

ហើយប្រភពដែលមិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយ និងបដិសេធមិនបង្ហាញឈ្មោះ ក៏មិនបានបញ្ជាក់នោះដែរថា តើមានយន្តហោះប៉ុន្មានគ្រឿងដែលពាក់ព័ន្ធ ឬពេលណាដែលទីក្រុងរ៉ូមបដិសេធមិនផ្តល់ការអនុញ្ញាតនេះ។

សារព័ត៌មាន Corriere della Sera បានបន្ថែមថា ការអនុញ្ញាតមិនត្រូវបានផ្តល់ឲ្យទេ ដោយសារសហរដ្ឋអាមេរិកមិនបានស្វែងរកការអនុញ្ញាតនេះ ហើយថ្នាក់ដឹកនាំយោធារបស់អ៊ីតាលី មិនត្រូវបានពិគ្រោះយោបល់ជាមួយ តាមអ្វីដែលបានចែងក្នុងសន្ធិសញ្ញាគ្រប់គ្រងការប្រើប្រាស់ទីតាំងយោធារបស់សហរដ្ឋអាមេរិក នៅក្នុងប្រទេសនេះ។

ក្រសួងការពារជាតិអ៊ីតាលីមិនមានការអត្ថាធិប្បាយអ្វីភ្លាមៗឡើយ។ គណបក្សប្រឆាំងកណ្តាល-ឆ្វេងនិយម បានជំរុញឲ្យរដ្ឋាភិបាលរារាំងការប្រើប្រាស់មូលដ្ឋានទ័ពរបស់សហរដ្ឋអាមេរិក នៅក្នុងប្រទេសអ៊ីតាលី ដើម្បីជៀសវាងការចូលរួមក្នុងជម្លោះ៕