លោកប្រធានាធិបតី Donald Trump បាននិយាយកាលពីថ្ងៃអង្គារ ៣១ មីនាសប្ដាហ៍នេះ ថា សហរដ្ឋអាមេរិកអាចបញ្ចប់យុទ្ធនាការយោធារបស់ខ្លួនប្រឆាំងនឹងអ៊ីរ៉ង់ក្នុងរយៈពេលពីរទៅបីសប្តាហ៍ទៀត។

លោកបានប្រាប់ក្រុមអ្នកសារព័ត៌មាននៅក្នុងការិយាល័យ Oval របស់សេតវិមានថា ពួកលោកនឹងចាកចេញឆាប់ៗនេះ ដោយបន្ថែមថា ការចាកចេញអាចកើតឡើង ក្នុងរយៈពេលពីរសប្តាហ៍ ឬប្រហែលជាបី សប្ដាហ៍។   

សេចក្តីប្រកាសនេះគឺជាការបញ្ជាក់យ៉ាងច្បាស់បំផុតរបស់លោក Trump ថា លោកមានបំណងបញ្ចប់សង្គ្រាមរយៈពេលមួយខែជាងមកនេះ ដែលបានធ្វើឲ្យកក្រើកតំបន់មជ្ឈិមបូព៌ា រំខានដល់ទីផ្សារថាមពលសកល និងប៉ះពាល់តំណែងប្រធានាធិបតីរបស់មេដឹកនាំអាមេរិកមកពីគណបក្សសាធារណរដ្ឋរូបនេះ។

លោក Trump បានបន្ថែមថា ទីក្រុងតេអេរ៉ង់ មិនចាំបាច់ធ្វើកិច្ចព្រមព្រៀងជាមួយទីក្រុងវ៉ាស៊ីនតោនដើម្បីបញ្ចប់ជម្លោះនោះទេ។ 

លោកបាននិយាយថា អ៊ីរ៉ង់មិនចាំបាច់ធ្វើកិច្ចព្រមព្រៀងទេ នៅពេលសួរថាតើការទូតដែលទទួលបានជោគជ័យគឺជាតម្រូវការជាមុនសម្រាប់សហរដ្ឋអាមេរិកក្នុងការបញ្ចប់ជម្លោះដែរឬទេ។លោកបន្ថែមថា ពួកគេមិនចាំបាច់ធ្វើកិច្ចព្រមព្រៀងជាមួយលោកទេ។ 

ផ្ទុយទៅវិញ លោក Trump បាននិយាយថា តម្រូវការសម្រាប់ការបញ្ចប់ប្រតិបត្តិការនេះគឺថា អ៊ីរ៉ង់ត្រូវតែ «ដាក់ចូលទៅក្នុងយុគសម័យថ្ម» ដោយគ្មានសមត្ថភាពដើម្បីទទួលបានអាវុធនុយក្លេអ៊ែរក្នុងពេលឆាប់ៗនេះ។អ្នកនាំពាក្យសេតវិមាន លោកស្រី Karoline Leavitt បាននិយាយនៅលើបណ្ដាញសង្គម X ថា លោក Trump នឹងផ្តល់ព័ត៌មានថ្មីៗអំពីអ៊ីរ៉ង់នៅក្នុងសុន្ទរកថាមួយទៅកាន់ប្រជាជាតិនៅម៉ោង ១:០០នាទី ម៉ោងសកល នៅថ្ងៃព្រហស្បតិ៍ស្អែកនេះ ៕