ការស្ទង់មតិរបស់ស្ថាប័ន Reuters/Ipsos បានរកឃើញថា ជនជាតិអាមេរិក ២ភាគ៣ ជឿថា សហរដ្ឋអាមេរិក គួរតែប្រឹងប្រែងបញ្ចប់ការចូលរួមពាក់ព័ន្ធរបស់ខ្លួននៅក្នុងសង្គ្រាមអ៊ីរ៉ង់យ៉ាងឆាប់រហ័ស ទោះបីជាវាមិនអាចសម្រេចបានគោលដៅដែលកំណត់ដោយរដ្ឋបាលរបស់លោកប្រធានាធិបតី Donald Trump ក៏ដោយ។

អ្នកឆ្លើយតបប្រហែល ៦៦ភាគរយ នៅក្នុងការស្ទង់មតិ ដែលធ្វើឡើងចាប់ពីថ្ងៃទី២៧ ខែមីនា ដល់ថ្ងៃទី២៩ ខែមីនា បានបង្ហាញការយល់ឃើញនោះ ខណៈដែល ២៧ភាគរយ បានប្រាប់ថា សហរដ្ឋអាមេរិកគួរតែខិតខំសម្រេចគោលដៅទាំងអស់របស់ខ្លួន នៅក្នុងប្រទេសអ៊ីរ៉ង់ ទោះបីជាជម្លោះនៅតែបន្តរយៈពេលយូរក៏ដោយ។ ប្រហែល ៦ភាគរយ មិនបានឆ្លើយតប ចំពោះសំណួរនេះឡើយ។

ក្នុងចំណោមក្រុមសាធារណរដ្ឋរបស់លោក Trump ៤០ភាគរយ គាំទ្រការបញ្ចប់ជម្លោះយ៉ាងឆាប់រហ័ស ទោះបីជាវាមិនបានសម្រេចគោលដៅរបស់សហរដ្ឋអាមេរិកក៏ដោយ ខណៈដែល ៥៧ភាគរយ យល់ស្រប ចំពោះការចូលរួមយូរជាងនេះ។

អ្នកឆ្លើយតបសរុបចំនួន ៦០ភាគរយ បាននិយាយថា ពួកគេមិនយល់ស្របនឹងការវាយប្រហារដោយយោធារបស់សហរដ្ឋអាមេរិកលើប្រទេសអ៊ីរ៉ង់ឡើយ ខណៈដែល ៣៥ភាគរយ បានយល់ព្រម សម្រាប់ការស្ទង់មតិលើមនុស្ស ១.០២១នាក់។

គួរបញ្ជាក់ថា សង្គ្រាមរយៈពេល ១ខែ បានរីករាលដាលពាសពេញតំបន់មជ្ឈិមបូព៌ា ដោយបណ្ដាលឲ្យមនុស្សរាប់ពាន់នាក់បាត់បង់ជីវិត និងបានប៉ះពាល់ដល់សេដ្ឋកិច្ចពិភពលោក ដោយការកើនឡើងតម្លៃថាមពលជំរុញឲ្យមានក្ដីបារម្ភ អំពីអតិផរណាសកល៕