អាជ្ញាធរប្រទេសគុយបា បាននិយាយកាលពីថ្ងៃអង្គារ ទី៣១ ខែមីនា ថាខ្លួននឹងបញ្ជូនប្រេងឥន្ធនៈរបស់រុស្ស៊ីដែលបានទៅដល់កាលពីពេលថ្មីៗនេះ ទៅកាន់មន្ទីរពេទ្យនិងសម្រាប់ការផលិតថាមពល។

នាវា Anatoly Kolodkin កាលពីពេលថ្មីៗនេះបានចូលចតនៅឈូងសមុទ្រ Matanzas របស់ប្រទេសគុយបា ដោយផ្តល់ការដឹកជញ្ជូនប្រេងដ៏សំខាន់លើកដំបូងទៅកាន់ប្រទេសកោះមួយនេះ។

លោក Irenaldo Perez អនុប្រធានសហជីពប្រេងរដ្ឋ CUPET បានប្រាប់ទូរទស្សន៍រដ្ឋគុយបាថា ប្រេងឥន្ធនៈនឹងទៅដល់មន្ទីរពេទ្យ និងសាលាបណ្ដុះបណ្ដាលជាមុនសិន ខណៈប្រេងម៉ាស៊ូតនឹងត្រូវបាននាំជាចម្បងទៅកាន់ទីតាំងផលិតថាមពលដែលត្រូវចែកចាយ។

ការប្រកាសនេះ ធ្វើឡើងបន្ទាប់ពីការដាច់ចរន្តអគ្គិសនីរយៈពេលជាច្រើនខែ ដែលបានធ្វើឱ្យប្រជាជនគុយបា រាប់លាននាក់គ្មានអគ្គិសនីប្រើប្រាស់ជាច្រើនម៉ោងក្នុងមួយថ្ងៃ។

ការទៅដល់របស់នាវា Anatoly Kolodkin ជានាវាបំពាក់ទង់ជាតិរុស្ស៊ី ដឹកប្រេងឆៅរបស់រុស្ស៊ីប្រហែល ៧០០.០០០បារ៉ែល ផ្តល់នូវវិធានការធូរស្រាលមួយកម្រិត។

សហរដ្ឋអាមេរិកបាននិយាយថា ខ្លួនបានអនុញ្ញាតឱ្យមានការដឹកជញ្ជូននេះដោយផ្អែកលើមូលដ្ឋានមនុស្សធម៌។