ភ្នំពេញ៖ ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានដាក់ចេញផែនការ ដើម្បីបញ្ចប់ ជំងឺ របេង របស់កម្មវិធីជាតិឆ្នាំ២០២១- ឆ្នាំ២០៣០, កាលពីរសៀលថ្ងៃទី៣១ ខែមីនា ឆ្នាំ២០២២។

នាឱកាសបិទសន្និបាតការងារ កំចាត់រោគរបេង ទូទាំងប្រទេសលើកទី២៥ ឯកឧត្តម សាស្រ្តាចារ្យ ម៉ម ប៊ុនហេង បានសង្កត់ធ្ងន់ថា បានណែនាំមន្រ្តីសុខាភិបាលអនុវត្តផែនការដើម្បីឲ្យការងារប្រយុទ្ធ​នឹងជំងឺរបេងទទួលបានជោគជ័យបន្ថែមទៀត ពិសេសស្របតាមផែនការយុទ្ធសាស្រ្តបញ្ចប់ជំងឺរបេង របស់កម្មវិធីជាតិឆ្នាំ២០២១-ឆ្នាំ២០៣០។

ឯកឧត្តម សាស្រ្តាចារ្យ ម៉ម ប៊ុនហេង បានណែនាំមន្រ្តីសុខាភិបាល ត្រូវតែខិតខំប្រឹងប្រែងថែមទៀត ក្នុង​ការស្រាវជ្រាវអ្នកជំងឺរបេងគ្រប់ ​ជំរុញការផ្តល់សេវាស្រាវជ្រាវ​ និងព្យាបាលជំងឺរបេង ដល់​ក្រុម​មាន​ហានិភ័យខ្ពស់ ត្រូវរៀបចំពង្រឹង និងពង្រីកឲ្យបានប្រសើរឡើងថែមទៀត ក្នុងការងារប្រយុទ្ធ​នឹង​ជំងឺ​របេងស៊ាំនឹងឱសថ។

បន្ថែមពីលើនេះ ត្រូវរក្សាឲ្យបានដំណើរការ សកម្មភាពការងារប្រយុទ្ធនឹងជំងឺរបេង នៅមនី្ទរពេទ្យ មណ្ឌល សុខភាព បន្តជំរុញការចូលរួម ​ពីស្ថាប័នសុខាភិបាលដទៃទៀត ​និងពង្រឹងថែមទៀត កិច្ច​សហប្រតិបតិ្តការ ​ជាមួយដៃគូគ្រប់លំដាប់ថ្នាក់ ​និងជំរុញថែមទៀត ​ការគៀងគរធនធាន ដើម្បី​សម្រេច​ទិសដៅ​របស់កម្មវិធី ​សម្រាប់ឆ្នាំ២០២២ ​និងឆ្នាំបន្ត។

បើតាមលោកវេជ្ជបណ្ឌិត ហួត ចាន់យុដា ប្រធានមជ្ឈមណ្ឌលជាតិ កំចាត់រោគរបេង ​និងហង់សិន បានឲ្យដឹងថា ​បញ្ហាជាចំបងរបស់កម្មវិធីជាតិ ​គឺធ្វើយ៉ាងណាស្វែងរកធនធានបន្ថែម សម្រេច​បាន​ទិសដៅ​នៅចុងឆ្នាំ២០២២ ​និងឆ្នាំបន្តបន្ទាប់ ​ពិសេសសំរេចបានទិសដៅនៃផែនការ ​យុទ្ធសាស្រ្ត បញ្ចប់​ជំងឺរបេងនៅកម្ពុជាឆ្នាំ២០២១-ឆ្នាំ២០៣០​ ដែល​ស្រប​តាម​យុទ្ធសាស្រ្ត​បញ្ចប់​ជំងឺ​ របេង​សកលលោក​ និង​គោល​ដៅ​អភិវឌ្ឍន៍​ប្រកបដោយចីរភាព៕រូបភាព៖ អត្ថបទ រដ្ឋា