រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយកាលពីថ្ងៃអង្គារ (ទី៣១ ខែមីនា ឆ្នាំ២០២៦) ថា ប្រទេសអ៊ីរ៉ង់មិនស្វែងរកបទឈប់បាញ់នោះទេ ប៉ុន្តែចង់បានការបញ្ចប់សង្គ្រាមទាំងស្រុង នៅទូទាំងតំបន់ ដោយសង្កត់ធ្ងន់ថា ដំណោះស្រាយណាមួយ ត្រូវតែរួមបញ្ចូលការធានាមិនមានការវាយប្រហារនាពេលអនាគត និងសំណង សម្រាប់ការខូចខាត។

លោក Araghchi បាននិយាយថា ទំនាក់ទំនងជាមួយសហរដ្ឋអាមេរិក មិនមែនជាការចរចាផ្លូវការទេ ប៉ុន្តែគ្រាន់តែការផ្លាស់ប្តូរសារ ដោយផ្ទាល់ ឬតាមរយៈអន្តរការីក្នុងតំបន់ប៉ុណ្ណោះ។ លោកបានប្រាប់ប្រព័ន្ធផ្សព្វផ្សាយ Al Jazeera ថា លោកនៅតែបន្តទទួលសារ ពីតំណាងសហរដ្ឋអាមេរិក គឺលោក Steve Witkoff ដូចកាលពីមុន ប៉ុន្តែបានលើកឡើងថា វាមិនគួរត្រូវបានបកស្រាយថា ជាការចរចាផ្លូវការនោះទេ។

លោកបាននិយាយថា សារទាំងនោះត្រូវបានបញ្ជូនតាមរយៈក្រសួងការបរទេស ដោយមានការទាក់ទងមួយចំនួន រវាងស្ថាប័នសន្តិសុខ ដោយបន្ថែមថា មិនមានការចរចាជាមួយអង្គភាពជាក់លាក់ណាមួយ នៅក្នុងប្រទេសអ៊ីរ៉ង់ទេ។

លោក Araghchi បានបង្ហាញថា ការផ្លាស់ប្តូរសារត្រូវបានធ្វើឡើងក្នុងក្របខ័ណ្ឌរដ្ឋាភិបាលផ្លូវការ ក្រោមការត្រួតពិនិត្យរបស់ក្រុមប្រឹក្សាសន្តិសុខជាតិកំពូលរបស់អ៊ីរ៉ង់។ លោកបានសង្កត់ធ្ងន់ថា សារទាំងនោះ រួមមានការព្រមាន និងទស្សនៈទៅវិញទៅមក ដែលបញ្ជូនតាមរយៈបណ្តាញជាក់លាក់។

ដោយឆ្លើយតបទៅនឹងរបាយការណ៍ ដែលថា អ៊ីរ៉ង់បានឆ្លើយតបទៅនឹងសំណើចំនួន ១៥ចំណុចរបស់សហរដ្ឋអាមេរិក លោក Araghchi បាននិយាយថា មិនទាន់មានការឆ្លើយតបណាមួយ ត្រូវបានផ្ញើនៅឡើយទេ ហើយទីក្រុងតេអេរ៉ង់ មិនទាន់បានដាក់សំណើ ឬលក្ខខណ្ឌណាមួយនៅឡើយទេ រហូតមកដល់ពេលនេះ៕