ក្រសួងការពារជាតិកាតា បាននិយាយនៅថ្ងៃពុធនេះថា នាវាដឹកប្រេងមួយគ្រឿងដែលជួលឲ្យក្រុមហ៊ុនថាមពលរដ្ឋរបស់ខ្លួន ត្រូវបានវាយប្រហារដោយមីស៊ីលអ៊ីរ៉ង់ នៅក្នុងដែនទឹករបស់ប្រទេសនេះ។

ក្រសួងបាននិយាយនៅក្នុងសេចក្តីថ្លែងការណ៍មួយនៅលើប្រព័ន្ធផ្សព្វផ្សាយសង្គម X ថា៖«កាតាត្រូវបានកំណត់គោលដៅ... ដោយមីស៊ីលតម្រង់គោលដៅចំនួនបីគ្រាប់ដែលបាញ់ចេញពីអ៊ីរ៉ង់»។

ក្រសួងបានបញ្ជក់ថា យោធាកាតា«បានស្ទាក់ចាប់មីស៊ីលតម្រង់គោលដៅចំនួនពីរគ្រាប់ ខណៈដែលមីស៊ីលទីបី បានវាយប្រហារនាវាដឹកប្រេងដែលជួលឲ្យក្រុមហ៊ុន QatarEnergy នៅក្នុងដែនទឹករបស់ប្រទេសកាតា»។

ក្រសួងការពារជាតិ បានបន្ថែមថា៖«ការសម្របសម្រួល ត្រូវបានបង្កើតឡើងជាមួយអាជ្ញាធរពាក់ព័ន្ធ ដើម្បីជម្លៀសនាវាដឹកប្រេង ដែលមានសមាជិកនាវិកចំនួន ២១ នាក់ នៅលើនាវានោះ ដោយពុំមានមនុស្សស្លាប់ទេ»។

អ៊ីរ៉ង់បានចាប់ផ្តើមការវាយប្រហារដោយមីស៊ីលដែលកំណត់គោលដៅលើទីតាំងថាមពល និងហេដ្ឋារចនាសម្ព័ន្ធនៅក្នុងតំបន់ឈូងសមុទ្រក្នុងរយៈពេលមួយខែកន្លងមកនេះ ដើម្បីឆ្លើយតបទៅនឹងការវាយប្រហាររបស់សហរដ្ឋអាមេរិក និងអ៊ីស្រាអែល ដែលបានចាប់ផ្តើម នៅចុងខែកុម្ភៈ៕