អ្នកនាំពាក្យការិយាល័យប្រធានាធិបតីនិយាយនៅថ្ងៃពុធនេះថា ហ្វីលីពីនបានស្វែងរកច្រកសុវត្ថិភាពសម្រាប់ការដឹកជញ្ជូនប្រេងត្រូវការខ្លាំង នៅក្នុងជំនួបជាមួយអ៊ីរ៉ង់ ស្របពេលប្រទេសមួយនេះ ប្រជែងជាមួយប្រទេសក្នុងតំបន់ ដើម្បីស្វែងរកប្រេង ។

តម្លៃប្រេងបានហក់ឡើងខ្ពស់ជាប្រវត្តិសាស្រ្តនៅហ្វីលីពីន ចាប់តាំងពីសម្ព័ន្ធមិត្តសន្ធិសញ្ញាសហរដ្ឋអាមរិក និងអ៊ីស្រាអែល បើកការវាយប្រហារលើអ៊ីរ៉ង់កាលពីថ្ងៃទី ២៨ ខែកុម្ភៈ ក្នុងនោះទីក្រុងតេអេរ៉ង់ បានបិទដោយប្រសិទ្ធិភាពច្រកសមុទ្រ Hormuz មិនអនុញ្ញាតឲ្យធ្វើនាវាចរណ៍ ចាប់តាំងពីពេលនោះរហូតមក ។

លោកប្រធានាធិបតី Ferdinand Marcos បានប្រកាសដាក់រដ្ឋក្នុងគ្រាអាសន្នថាមពលជាតិកាលពីសប្តាហ៍មុន ហើយក្រោយមកលោកនិយាយថា គ្មានអ្វីថាមិនមាននៅលើតុនោះទេ ស្របពេលដែលប្រទេសមានពលរដ្ឋរស់នៅ ១១៦លាននាក់មួយនេះ ព្យាយាមឈានដល់តម្រូវការប្រេងរបស់ខ្លួន ។

នៅថ្ងៃពុធនេះដែរ រដ្ឋមន្រ្តីការបរទេសហ្វីលីពីនលោកស្រី Theresa Lazaro បាននិយាយថា លោកស្រីបានស្វែងរកមធ្យោបាយសំខាន់ៗ សម្រាប់កិច្ចសហប្រតិបត្តិការនៅក្នុងជំនួបជាមួយឯកអគ្គរដ្ឋទូតអ៊ីរ៉ង់លោក Yousef Esmaeilzadeh ដែលរួមបញ្ចូលរដ្ឋមន្រ្តីថាមពលហ្វីលីពីនផងដែរ ។

លោកស្រីនិយាយនៅក្នុងសារបង្ហោះលើបណ្តាញព័ត៌មានសង្គម Xថា ផ្អែកលើសន្ទុះនៃក្រុមពិគ្រោះយោបល់នយោបាយខែវិច្ឆិកា ឆ្នាំ ២០២៥ ពួកយើងប្តេជ្ញាចិត្តពង្រឹងកិច្ចសហប្រតិបត្តិការនៅជួរមុខទាំងអស់ ជាពិសេសកិច្ចសហប្រតិបត្តិការថាមពល ៕