មន្ត្រីជាន់ខ្ពស់អ៊ីរ៉ង់មួយរូបបានបដិសេធការអះអាងរបស់ប្រធានាធិបតីអាមេរិកលោក Donald Trump ដែលថា "ប្រធានាធិបតីរបបថ្មី" ទំនងជាសំដៅទៅលើលោក Masoud Pezeshkian របស់អ៊ីរ៉ង់បានស្នើសុំបទឈប់បាញ់ ខណៈសហរដ្ឋអាមេរិក និងអ៊ីស្រាអែលបន្តសង្គ្រាមលើប្រទេសនេះ។

ដោយរាយការណ៍ពីរដ្ឋធានីអ៊ីរ៉ង់កាលពីថ្ងៃពុធ១មេសាសប្ដាហ៍នេះ លោក Ali Hashem អ្នកយកព័ត៌មាន Al Jazeera បាននិយាយថា មន្ត្រីជាន់ខ្ពស់អ៊ីរ៉ង់មួយរូបបានច្រានចោលការបង្ហោះរបស់លោក Trump នៅលើប្រព័ន្ធផ្សព្វផ្សាយសង្គមដោយអះអាងថា "ប្រធានាធិបតីរបបថ្មីរបស់អ៊ីរ៉ង់ ទើបតែបានស្នើសុំសហរដ្ឋអាមេរិកសម្រាប់បទឈប់បាញ់!។

លោក Hashemនិយាយថា អ៊ីរ៉ង់កំពុងបដិសេធថាពួកគេពុំបានស្នើសុំបទឈប់បាញ់ណាមួយទេ ។

អ្នកនាំពាក្យក្រសួងការបរទេសអ៊ីរ៉ង់ លោក Ismail Baghaei បានទាត់ចោលសេចក្ដីថ្លែងការណ៍របស់លោក Trump នៅក្នុងការអត្ថាធិប្បាយមួយទៅកាន់សារព័ត៌មាន Al Jazeera ដោយនិយាយថា ជាសម្ដីគ្មានការពិត និងគ្មានមូលដ្ឋាន។ 

ក្នុងការបង្ហោះមួយនៅលើបណ្ដាញសង្គម Truth Social របស់លោក លោក Trump កាលពីថ្ងៃពុធដដែលបាននិយាយថា រដ្ឋបាលរបស់លោកនឹងពិចារណាលើសំណើបទឈប់បាញ់ នៅពេលច្រកសមុទ្រ Hormuz បើកចំហ សេរី និងច្បាស់លាស់។

ការអះអាងរបស់លោក Trump បានកើតឡើងត្រឹមតែប៉ុន្មានម៉ោងមុនពេលលោកថ្លែងសុន្ទរកថាផ្តល់នូវអ្វីដែលសេតវិមានបាននិយាយថាជាព័ត៌មានថ្មីៗដ៏សំខាន់ស្តីពីសង្គ្រាមនៅអ៊ីរ៉ង់។

រដ្ឋបាលលោក Trump បានប្រឈមនឹងសម្ពាធកាន់តែខ្លាំងជុំវិញសង្គ្រាមអាមេរិក-អ៊ីស្រាអែល លើប្រទេសអ៊ីរ៉ង់ ស្របពេលមានការហក់ឡើងនៃតម្លៃថាមពលសកល និងការប្រឆាំងយ៉ាងទូលំទូលាយចំពោះជម្លោះនេះក្នុងចំណោមសាធារណជនអាមេរិក៕