អ្នកនាំពាក្យក្រសួងការបរទេសរុស្ស៊ី បាននិយាយកាលពីថ្ងៃពុធ ទី១ ខែមេសា ថារុស្ស៊ីនឹងបន្តផ្តល់ជំនួយដល់ប្រទេសគុយបា មួយថ្ងៃបន្ទាប់ពីនាវាដឹកប្រេងរបស់រុស្ស៊ីមួយគ្រឿងបានទៅដល់ដើម្បីជួយផ្គត់ផ្គង់ដល់ប្រទេសកោះដែលខ្វះប្រេងឥន្ធនៈក្នុងរយៈពេលប៉ុន្មានខែមកនេះដោយការដឹកជញ្ជូនប្រេងឆៅលើកដំបូងរបស់ខ្លួន។

ប្រទេសគុយបា បានរងការលំបាកដោយសារវិបត្តិថាមពលចាប់តាំងពីខែមករា នៅពេលដែលកងកម្លាំងសហរដ្ឋអាមេរិក បានចាប់ខ្លួនប្រធានាធិបតីវ៉េណេស៊ុយអេឡា និងជាសម្ព័ន្ធមិត្តគុយបា លោក Nicolas Maduro។

ការដកលោកចេញពីតំណែង ជាការដកអ្នកផ្គត់ផ្គង់ប្រេងដ៏សំខាន់របស់ប្រទេសគុយបា។ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយនៅក្នុងសន្និសីទសារព័ត៌មានប្រចាំសប្តាហ៍ថា «គុយបា គឺជាមិត្ត និងដៃគូជិតស្និទ្ធបំផុតរបស់យើងនៅក្នុងតំបន់សមុទ្រការ៉ាអ៊ីប ហើយយើងពុំមានសិទ្ធិបោះបង់ចោលប្រទេសនេះទេ ដោយជំនួយដល់ប្រទេសគុយបា នឹងបន្ត»។

នាវាដឹកប្រេងរបស់រុស្ស៊ីមួយគ្រឿងបានចូលទៅដល់កំពង់ផែ Matanzas ប្រទេសគុយបា កាលពីថ្ងៃអង្គារ ដោយដឹកប្រេងចំនួន ៧៣០.០០០បារ៉ែល បន្ទាប់ពីបានធ្វើដំណើររយៈពេលបីសប្តាហ៍ពីប្រទេសរុស្ស៊ី។

ទីក្រុងមូស្គូ បានរក្សាទំនាក់ទំនងជិតស្និទ្ធជាមួយទីក្រុងឡាហាវ៉ានជាប្រវត្តិសាស្ត្រ ហើយបានរិះគន់ទីក្រុងវ៉ាស៊ីនតោន ចំពោះការរារាំងការដឹកជញ្ជូនប្រេងឥន្ធនៈទៅកាន់ប្រទេសកោះមួយនេះ។