លោកប្រធានាធិបតី Volodymyr Zelenskyy និងក្រុមមន្ត្រីអ៊ុយក្រែនបានជួបជាមួយក្រុមមន្ត្រីចរចាអាមេរិក តាមទូរសព័ព្ទកាលពីថ្ងៃទី១មេសាសប្ដាហ៍នេះ ដើម្បីពិភាក្សាសំណើរបស់ទីក្រុងគីវសម្រាប់បទឈប់បាញ់នៅថ្ងៃបុណ្យEaster ជាមួយរុស្ស៊ី និងកិច្ចខិតខំប្រឹងប្រែងសន្តិភាពកាន់តែទូលំទូលាយ។

មេដឹកនាំអ៊ុយក្រែនរូបនេះ បាននិយាយក្នុងសុន្ទរកថាជាវីដេអូមួយលើTelegram របស់លោកថា ការផ្អាកប្រយុទ្ធនៅថ្ងៃបុណ្យ Easter អាចបញ្ជាក់ជាសញ្ញាមួយដល់មនុស្សគ្រប់គ្នាថា ការទូតអាចទទួលបានជោគជ័យ ដោយបន្ថែមថា សញ្ញាខុសៗគ្នា គឺត្រូវការជាចាំបាច់។

បេសកជនអាមេរិកលោក Steve Witkoff និងលោក Jared Kushner ប្រមុខអង្គការណាតូ លោក Mark Rutte សមាជិកព្រឹទ្ធសភាអាមេរិកលោក Lindsey Graham ប្រធានការិយាល័យប្រធានាធិបតីអ៊ុយក្រែន លោក Kyrylo Budanov និងមន្ត្រីផ្សេងទៀតបានចូលរួមកិច្ចពិភាក្សាតាមអនឡាញដែលលោក Zelenskyy បានពិពណ៌នាថាមានភាពវិជ្ជមាន។

អ្នកនាំពាក្យវិមានក្រឹមឡាំង លោក Dmitry Peskov និយាយថា រុស្ស៊ីពុំទទួលយកបទឈប់បាញ់បណ្តោះអាសន្នក្នុងជម្លោះនៅអ៊ុយក្រែនឡើយ ហើយផ្ទុយទៅវិញអំពាវនាវឱ្យមានសន្តិភាពយូរអង្វែង ខណៈរុស្ស៊ីនៅតែបន្តវាយប្រហារ។

 លោក Zelenskyyបានស្នើឲ្យមានបទឈប់បាញ់នៅថ្ងៃបុណ្យ Easter កាលពីថ្ងៃចន្ទដើមសប្ដាហ៍នេះ ។ជាការឆ្លើយតប លោក Peskov បាននិយាយថា សំណើរបស់លោក Zelenskyy មិនមែនជាគំនិតផ្តួចផ្តើមច្បាស់លាស់នោះទេ ដោយកត់សម្គាល់ថាមេដឹកនាំអ៊ុយក្រែន គួរតែបន្តការដោះស្រាយសន្តិភាពដ៏យូរអង្វែងជាជាងបទឈប់បាញ់ ព្រោះតម្លៃនៃសន្តិភាពសម្រាប់អ៊ុយក្រែននឹងកើនឡើងតាមពេលវេលា។

លោក Peskov បានថ្លែងនៅក្នុងសន្និសីទសារព័ត៌មានមួយថា រុស្ស៊ី សូមបញ្ជាក់ម្តងទៀតថា លោក Zelenskyy ត្រូវតែទទួលខុសត្រូវ និងសម្រេចចិត្តសមស្រប ដើម្បីឲ្យពួកលោកសម្រេចបានសន្តិភាព មិនមែនគ្រាន់តែជាបទឈប់បាញ់នោះទេ។នៅឆ្នាំនេះ បុណ្យ Easter គ្រិស្តអូតូដុក (Orthodox Easter) នឹងត្រូវប្រារព្ធទាំងនៅអ៊ុយក្រែន និងរុស្ស៊ីនៅថ្ងៃទី១២ ខែមេសា៕