ក្រសួងការពារជាតិ បាននិយាយកាលពីថ្ងៃពុធ ទី១ ខែមេសា ថា ប្រទេសអាហ្វ្រិកខាងត្បូង បានដាក់ពង្រាយសមាជិកកងកម្លាំងប្រដាប់អាវុធរបស់ខ្លួនដើម្បីគាំទ្រដល់កិច្ចខិតខំប្រឹងប្រែងរបស់នគរបាលក្នុងការទប់ស្កាត់ឧក្រិដ្ឋកម្មហិង្សានៅក្នុងតំបន់ដែលរងផលប៉ះពាល់ដោយក្រុមជនអន្ធពាលនៅ Western Cape។

ការដាក់ពង្រាយនេះ នឹងមើលឃើញទាហានជួយដល់នគរបាលក្នុងការល្បាត ការបិទផ្លូវ និងប្រតិបត្តិការចារកម្មនៅក្នុងសហគមន៍នានាដែលញាំញីដោយការបាញ់ប្រហារជាប់ពាក់ព័ន្ធនឹងក្រុមជនអន្ធពាលនៃឧក្រិដ្ឋកម្មរៀបចំទុក។

អាជ្ញាធរបាននិយាយថា ចំណាត់ការនេះមានគោលបំណងធ្វើឱ្យចំណុចក្តៅនៃឧក្រិដ្ឋកម្មមានស្ថេរភាព ដែលអំពើហិង្សារបស់ក្រុមជនអន្ធពាលបានជំរុញឱ្យអត្រាឃាតកម្មកើនឡើង និងធ្វើឱ្យប្រជាជនរស់នៅក្នុងការភ័យខ្លាច។ កងទ័ព នឹងធ្វើប្រតិបត្តិការក្រោមបញ្ជារបស់នគរបាល ហើយនឹងពុំមានអំណាចចាប់ខ្លួនទេ។ Western Cape ជាទីតាំងនៃទីក្រុងកំពង់ផែ Cape Town បានកត់ត្រាកម្រិតខ្ពស់បំផុតនៃឧក្រិដ្ឋកម្មទាក់ទងនឹងក្រុមជនអន្ធពាលនៅក្នុងប្រទេស ដោយអំពើហិង្សាជារឿយៗប្រមូលផ្តុំនៅក្នុងទីប្រជុំជនមានប្រជាជនរស់នៅច្រើន។

ស្នងការនគរបាល បាននិយាយថា ការផ្តោតសំខាន់គឺទៅលើការដកហូតអាវុធខុសច្បាប់ និងការបង្អាក់ដល់បណ្តាញក្រុមជនអន្ធពាល ហើយ«អ្វីដែលយើងកំពុងសម្លឹងមើល គឺការដកហូតអាវុធខុសច្បាប់ ព្រមទាំងការបង្ក្រាបគ្រឿងញៀន និងមេដឹកនាំ និងសមាជិកក្រុមជនអន្ធពាល» ដោយ «យើងកំពុងឆែកឆេរនៅតាមលំនៅឋានដើម្បីរកទំនិញខុសច្បាប់ អាវុធ និងគ្រឿងញៀន»។