យោងតាមអង្គការមនុស្សធម៌របស់អង្គការសហប្រជាជាតិ បាននិយាយកាលពីថ្ងៃពុធថា ការវាយប្រហារនៅទូទាំងប្រទេសអ៊ីរ៉ង់ ធ្វើឲ្យប៉ះពាល់ដល់ហេដ្ឋារចនាសម្ព័ន្ធស៊ីវិល ដោយបានបង្កើនតម្រូវការជំនួយសង្គ្រោះ ខណៈបុគ្គលិកផ្តល់ជំនួយនៅមជ្ឈិមបូព៌ាកំពុងតតាំងជាមួយនឹងការរឹតត្បិតដំណើការចូល។

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយថា ការវាយប្រហារតាមអាកាសនៅក្នុងប្រទេសអ៊ីរ៉ង់ បានប៉ះពាល់យ៉ាងធ្ងន់ធ្ងរដល់សេវាសំខាន់ៗជាច្រើន។ ក្រសួងសុខាភិបាលអ៊ីរ៉ង់ បានរាយការណ៍ថា មណ្ឌលសុខភាពចំនួន៣០៩កន្លែង និងរថយន្តគិលានសង្គ្រោះចំនួន៤២គ្រឿង បានរងការខូចខាត ដោយមន្ទីរពេទ្យចំនួន៧កន្លែង បានជម្លៀសអ្នកជំងឺចេញ ចាប់តាំងពីការវាយប្រហារបានចាប់ផ្តើមនៅថ្ងៃទី ២៨ ខែកុម្ភៈ។

អង្គការ OCHA ក៏បាននិយាយផងដែរថា ការរំខានដល់ផ្នែកថាមពល និងការដាច់ចរន្តអគ្គិសនី ត្រូវបានរាយការណ៍នៅក្នុងតំបន់ជាច្រើន ហើយរោងចក្របន្សាបទឹកប្រៃនៅលើកោះQeshm ក្នុងខេត្ត Hormozgan ត្រូវបានរងផលប៉ះពាល់។

សមាគមអឌ្ឍចន្ទក្រហមអ៊ីរ៉ង់ (IRCS) បាននិយាយថា គិតត្រឹមថ្ងៃពុធ អគារស៊ីវិលជាង ១១៥.០០០កន្លែង រួមមានមណ្ឌលសុខភាព អគារអប់រំ លំនៅឋាន និងអគារពាណិជ្ជកម្ម បានរងការបំផ្លាញ។

ក្រសួងអប់រំ បានរាយការណ៍ពីការខូចខាតដល់អគារអប់រំជាង៧០០កន្លែង។

អ្នកឆ្លើយតបមនុស្សធម៌ នៅតែសកម្ម ដោយក្រុមសមាគមអឌ្ឍចន្ទក្រហមអ៊ីរ៉ង់ (IRCS) កំពុងធ្វើប្រតិបត្តិការនៅក្នុងតំបន់ដែលរងផលប៉ះពាល់ជាង ១.២០០កន្លែង។