អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានថ្លែងនៅក្នុងសន្និសីទសារព័ត៌មានមួយថា ការផ្ទេរការគ្រប់គ្រងលើច្រកសមុទ្រហ័រមូសទៅឲ្យប្រទេសទី ៣ ឬការបង្កើតរចនាសម្ព័ន្ធគ្រប់គ្រងអន្តរជាតិ ដោយគ្មានការយល់ព្រមពីរដ្ឋឈូងសមុទ្រពែក្សទាំងអស់ នឹងមិនរួមចំណែកដល់ការបន្ធូរបន្ថយភាពតានតឹង នៅក្នុងតំបន់នោះទេ។ 

លោកស្រីបានឆ្លើយតបទៅនឹងសំណួរមួយអំពីបញ្ហានេះថា៖«គំនិតផ្តួចផ្តើមណាមួយទាក់ទងនឹងការធ្វើនាវាចរណ៍នៅក្នុងច្រកសមុទ្រហ័រមូស ត្រូវតែអនុវត្តដោយផ្អែកលើការឯកភាពគ្នារបស់រដ្ឋឆ្នេរសមុទ្រ ដោយគិតគូរពីផលប្រយោជន៍របស់ពួកគេ។ ការផ្ទេរការគ្រប់គ្រងផ្លូវទឹកយុទ្ធសាស្ត្រនេះ ទៅឲ្យប្រទេសទី៣ ឬការបង្កើតរចនាសម្ព័ន្ធគ្រប់គ្រងអន្តរជាតិ ដោយគ្មានការយល់ព្រមពីរដ្ឋឈូងសមុទ្រពែក្សទាំងអស់ ហាក់ដូចជាមិនបានរួមចំណែកដល់ការបន្ធូរបន្ថយភាពតានតឹង នៅក្នុងតំបន់នោះទេ»។ 

អ្នកការទូតរូបនេះ បានសង្កត់ធ្ងន់ថា ការសម្រេចនេះ នឹងរំលោភលើច្បាប់សមុទ្រអន្តរជាតិ។

លោកស្រីបានបន្ថែមថា៖« ខ្ញុំសូមរំលឹកអ្នក ដូចដែលមនុស្សគ្រប់គ្នាប្រហែលជាដឹងរួចហើយថា ច្រកសមុទ្រហ័រមូស មានទទឹង ២០ម៉ាយសមុទ្រ នៅចំណុចតូចចង្អៀតបំផុតរបស់វា។ នេះមានន័យថា វាមិនអាចឆ្លងកាត់បានទេ បើមិនចូលទៅក្នុងសមុទ្រទឹកដីរបស់អ៊ីរ៉ង់ ឬអូម៉ង់ ដែលស្ថិតនៅក្រោមអធិបតេយ្យភាពរបស់រដ្ឋទាំងនោះ។ យើងមិនដឹងពីយន្តការផ្លូវច្បាប់ណាមួយដែលនឹងអនុញ្ញាតឲ្យមានការផ្ទេរដែនទឹក នៅក្នុងសមុទ្រទឹកដីរបស់ខ្លួន ទៅការគ្រប់គ្រងរបស់រដ្ឋផ្សេងទៀត ដោយគ្មានការយល់ព្រមពីអ៊ីរ៉ង់នោះទេ»៕