នៅថ្ងៃព្រហស្បតិ៍ (ទី២ ខែមេសា ឆ្នាំ២០២៦) នេះ នាយករដ្ឋមន្ត្រីអូស្ត្រាលី លោក Anthony Albanese បានលើកឡើងថា គោលបំណងដើមនៃសង្គ្រាម នៅអ៊ីរ៉ង់ ត្រូវបានសម្រេចហើយ តែគេមិនដឹងច្បាស់ថា តើនៅមានអ្វីទៀតដែលត្រូវសម្រេចឲ្យបាននោះ។

លោក Albanese បានអំពាវនាវឲ្យបន្ធូរបន្ថយភាពតានតឹង ដោយកត់សម្គាល់ថា ការវាយប្រហាររបស់សហរដ្ឋអាមេរិក និងអ៊ីស្រាអែល បានធ្វើឲ្យមូលដ្ឋានឧស្សាហកម្មទ័ពអាកាស កងទ័ពជើងទឹក និងយោធារបស់អ៊ីរ៉ង់ចុះខ្សោយហើយ។

ក្នុងអំឡុងពេលថ្លែងសុន្ទរកថា នៅរដ្ឋធានី Canberra លោកបានថ្លែងថា៖ «ឥឡូវនេះ គោលបំណងទាំងនោះ ត្រូវបានសម្រេចហើយ ហើយគេមិនច្បាស់ថា តើត្រូវសម្រេចអ្វីបន្ថែមទៀត ឬថា តើចំណុចបញ្ចប់មើលមានរូបភាពយ៉ាងដូចម្ដេច។ តែអ្វីដែលច្បាស់លាស់នោះ គឺថា សង្គ្រាមកាន់តែយូរ ផលប៉ះពាល់លើសេដ្ឋកិច្ចពិភពលោកនឹងកាន់តែធ្ងន់ធ្ងរ»។

អូស្ត្រាលី ដែលពឹងផ្អែកលើប្រេងឥន្ធនៈនាំចូល និងកាន់កាប់ការផ្គត់ផ្គង់ប្រេងសាំងប្រហែល ៣៧ថ្ងៃ បានប្រឹងប្រែងបន្ធូរបន្ថយផលប៉ះពាល់ដោយសារតម្លៃប្រេងឡើងខ្ពស់ ដោយកាត់បន្ថយពន្ធប្រេងសាំង និងសន្យាផ្តល់ប្រាក់កម្ចីចំនួន ៦៨០លានដុល្លារដល់ក្រុមហ៊ុននានា។ នៅមុននេះ លោក Albanese បាននិយាយថា អូស្ត្រាលីមិនមែនជាអ្នកចូលរួមក្នុងសង្គ្រាមនេះទេ។

រដ្ឋមន្ត្រីក្រសួងការពារជាតិ លោក Richard Marles បាននិយាយនៅថ្ងៃទី២ ខែមេសានេះថា ទីក្រុង Canberra កំពុងពិភាក្សាជាមួយចក្រភពអង់គ្លេស និងបារាំង អំពីរបៀបដែលខ្លួនអាចរួមចំណែកដល់ការបើកច្រកសមុទ្រ Hormuz ដែលតាមផ្លូវនោះ ១ភាគ៥ នៃប្រេងរបស់ពិភពលោកឆ្លងកាត់ ក្នុងអំឡុងពេលមិនទាន់មានជម្លោះ៕