កាលពីថ្ងៃព្រហស្បតិ៍ (២ មេសា) ប្រធានាធិបតីអាមេរិក លោក Donald Trump បានបញ្ជាឱ្យដំឡើងពន្ធ ១០០% លើការនាំចូលឱសថមានម៉ាកយីហោល្បីៗមួយចំនួន និងបានធ្វើការកែសម្រួលពន្ធលើដែកថែប អាលុយមីញ៉ូម និងទង់ដែង ខណៈរដ្ឋបាលរបស់លោក ព្យាយាមបន្តទៅមុខ បន្ទាប់ពីការដួលរលំនៃគោលនយោបាយពន្ធសកល ដែលលោកបានប្រកាសកាលពីមួយឆ្នាំមុន។

ការដាក់ចេញនូវកញ្ចប់ពន្ធថ្មីនេះ មានគោលបំណងមួយផ្នែកគឺដើម្បីស្ដារឡើងវិញនូវចំណូលពន្ធដែលបានបាត់បង់ បន្ទាប់ពីតុលាការកំពូលអាមេរិក បានសម្រេចលុបចោលពន្ធសកលរបស់លោក កាលពីខែកុម្ភៈ។ យ៉ាងណាក៏ដោយ វិធានការនេះបានរងការរិះគន់ពីក្រុមធុរកិច្ចមួយចំនួន ដោយសារជំហាននេះបានបន្ថែមសម្ពាធលើការចំណាយថ្មីៗ ក្នុងអំឡុងពេលដែលសង្គ្រាមនៅអ៊ីរ៉ង់ បានធ្វើឱ្យតម្លៃថាមពលសម្រាប់អ្នកប្រើប្រាស់ហក់ឡើងខ្ពស់រួចទៅហើយ។

ក្នុងសេចក្តីប្រកាសថ្មីមួយដែលបង្ហាញពីលទ្ធផលនៃការស៊ើបអង្កេតសន្តិសុខជាតិលើការនាំចូលឱសថ លោក Trump បាននិយាយថា ផលិតករក្រៅស្រុកនៃផលិតផលដែលមានប៉ាតង់ ត្រូវតែយល់ព្រមធ្វើកិច្ចព្រមព្រៀងជាមួយរដ្ឋាភិបាលសហរដ្ឋអាមេរិក ដើម្បីកាត់បន្ថយតម្លៃឱសថតាមវេជ្ជបញ្ជា និងប្តេជ្ញាចិត្តផ្លាស់ប្តូរផលិតកម្មរបស់ពួកគេទៅកាន់សហរដ្ឋអាមេរិកវិញ។

យោងតាមមន្ត្រីរដ្ឋបាលម្នាក់បានឱ្យដឹងថា ក្រុមហ៊ុនបរទេសទាំងនោះត្រូវតែធ្វើកិច្ចការទាំងពីរនេះដើម្បីចៀសវាងការបង់ពន្ធទាំងស្រុង ហើយនឹងត្រូវប្រឈមពន្ធ ២០% ប្រសិនបើពួកគេគ្រាន់តែផ្លាស់ប្តូរការផលិតមួយផ្នែកទៅកាន់សហរដ្ឋអាមេរិក។ ចំពោះអ្នកដែលមិនអនុវត្តតាមលក្ខខណ្ឌណាមួយទាល់តែសោះ នឹងត្រូវប្រឈមការបង់ពន្ធដល់ទៅ ១០០%។ យ៉ាងណាមិញ ការយកពន្ធនេះនឹងមិនអនុវត្តចំពោះការនាំចូលឱសថពីគ្រប់ប្រទេសទាំងអស់នោះទេ។ ពន្ធលើឱសថមានម៉ាកយីហោនឹងត្រូវកំណត់ត្រឹមអតិបរមា ១៥% ក្រោមកិច្ចព្រមព្រៀងពាណិជ្ជកម្មជាមួយសហភាពអឺរ៉ុប ជប៉ុន កូរ៉េខាងត្បូង និងស្វីស៕