កន្សោមយាន Orion ដែលដឹកអវកាសយានិកចំនួន ៤រូប ក្នុងបេសកកម្ម Artemis II របស់អង្គការណាសា បានបញ្ឆេះម៉ាស៊ីនផ្ដាច់ខ្លួនពីយានជំរុញដោយជោគជ័យកាលពីថ្ងៃព្រហស្បតិ៍ (២ មេសា) ដែលដំណាក់កាលនេះនឹងបញ្ជូនក្រុមអវកាសយានិកឱ្យចាកចេញពីគន្លងផែនដី ហើយឆ្ពោះទៅកាន់តែកៀកនឹងឋានព្រះចន្ទ ក្នុងការបោះជំហានបំបែកកំណត់ត្រាពិភពលោកទៅកាន់ចម្ងាយឆ្ងាយបំផុតដែលមនុស្សជាតិមិនធ្លាប់បានធ្វើដំណើរទៅដល់ក្នុងលំហអាកាស។

ការផ្ដាច់កន្សោមយានចេញពីរ៉ូកែតជំរុញដ៏ជោគជ័យនេះ បានដាក់ក្រុមអវកាសយានិកណាសា ឱ្យស្ថិតលើផ្លូវដែលនឹងឈានចូលទៅក្នុងដែនទំនាញរបស់ព្រះចន្ទ នៅព្រឹកថ្ងៃអាទិត្យ ទី៥ ខែមេសា ខណៈពួកគេត្រៀមខ្លួនបំបែកកំណត់ត្រាចម្ងាយពីមុន ដែលបង្កើតឡើងដោយបេសកកម្ម អាប៉ូឡូ១៣ កាលពីឆ្នាំ១៩៧០។ បេសកកម្ម Artemis II ដែលចាកចេញពីផែនដីកាលពីថ្ងៃពុធសប្ដាហ៍នេះ ត្រូវបានរំពឹងថានឹងចំណាយពេលប្រហែល ១០ថ្ងៃ ដោយបញ្ជូនអវកាសយានិកទាំង ៤រូប ក្នុងដំណើរដ៏លឿនជុំវិញឋានព្រះចន្ទ រួចត្រឡប់មកផែនដីវិញ ដែលនេះជាបេសកកម្មមានមនុស្សជិះលើយានទៅកាន់ព្រះចន្ទ ជាលើកដំបូងបំផុតក្នុងពេលជាង ៥០ឆ្នាំមកនេះ។

នៅមុននោះ អវកាសយានិកបានស្ថិតក្នុងគន្លងផែនដីដែលមានរាងអេលីប ដោយធ្វើដំណើរក្នុងចម្ងាយឆ្ងាយបំផុតរហូតដល់ ៦៤.០០០គីឡូម៉ែត្រ និងជិតបំផុតប្រហែល ១៦០គីឡូម៉ែត្រពីផែនដី ដែលជាចំណុចចាប់ផ្តើមនៃការផ្ដាច់ចេញពីយានដំណាក់កាលទីមួយឆ្ពោះទៅកាន់ព្រះចន្ទ។ អង្គការណាសា រំពឹងថាបញ្ចេញរូបភាពដ៏កម្រដែលថតដោយក្រុមការងារនៅលើយាននោះក្នុងអំឡុងពេលបេសកកម្មនេះ បន្ទាប់ពីឆ្លងកាត់ចំណុចសំខាន់ៗផ្សេងទៀតនៃលំហ។

នៅថ្ងៃទី៦នៃបេសកកម្ម អវកាសយានិកត្រូវបានរំពឹងថានឹងទៅដល់ចម្ងាយប្រហែលជាង ៤០ ម៉ឺនគីឡូម៉ែត្រពីផែនដី ពោលគឺជាចំណុចឆ្ងាយបំផុតដែលមនុស្សមិនធ្លាប់បានទៅដល់ ជាទីដែលភពផែនដីនឹងមើលទៅមានទំហំតូចជាកូនបាល់ទៅទៀត នៅពេលមើលពីផ្ទៃម្ខាងនៃព្រះចន្ទ៕