រដ្ឋមន្ត្រីក្រសួងយុត្តិធម៌ បានបញ្ជាក់ថា ច្បាប់ស្តីពីការប្រឆាំង Online Scams បង្កើតនីតិវិធីពិសេសអាចស្នើឱ្យមានការបង្កក និងរឹបអូសទ្រព្យសម្បត្តិ ដែលជាមធ្យោបាយប្រព្រឹត្តបទល្មើស យកមកជាកម្មសិទ្ធិរបស់រដ្ឋ ។

ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ បានបន្តថា ច្បាប់ស្តីពីការប្រឆាំង Online Scams មានគោលដៅសំខាន់លើកកម្ពស់ប្រសិទ្ធភាពប្រឆាំង Online Scams និងដើម្បីធានាថា Online Scams នឹងមិនមាននៅកម្ពុជាទៀតទេ។ ហើយបង្ហាញពីការប្តេជ្ញាចិត្តរបស់រាជរដ្ឋាភិបាលប្រឆាំង Online Scams។

សេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ត្រង់មាត្រា១៩ .. ការផ្អាក ការឃាត់ទុក និងការបង្កក បានចែងថា ក្នុងករណីដែលពិនិត្យឃើញមានប្រតិបត្តិការសង្ស័យ ឬដើម្បីទប់ស្កាត់ការផ្ទេរចេញនូវសាច់ប្រាក់ពី គណនីដែលសង្ស័យថាមានជាប់ពាក់ព័ន្ធនឹងបទល្មើស ឬផលនៃបទល្មើសដែលមានកំណត់ក្នុងច្បាប់នេះ មន្ត្រីនគរបាលយុត្តិធម៌ អាចស្នើសុំដោយផ្ទាល់ទៅអង្គភាពស៊ើបការណ៍ហិរញ្ញវត្ថុកម្ពុជាឱ្យផ្អាកជាបណ្តោះអាសន្ន នូវប្រតិបត្តិការសង្ស័យ។ អង្គភាពស៊ើបការណ៍ហិរញ្ញវត្ថុកម្ពុជា ត្រូវធ្វើការផ្អាកប្រតិបត្តិការនោះភ្លាមៗ ដោយគ្មានបង្អង់។ ការផ្អាកប្រតិបត្តិការសង្ស័យ មានរយៈពេលមិនលើសពី ៤៨ (សែសិបប្រាំបី) ម៉ោង។ មន្ត្រីនគរបាលយុត្តិធម៌អាចស្នើសុំទៅព្រះរាជអាជ្ញាដើម្បីសម្រេចអំពីការឃាត់ទុកគណនីឬស្នើសុំទៅតុលាការ ដើម្បីសម្រេចបង្កកគណនីនោះ។ តុលាការអាចសម្រេចអំពីការឃាត់ទុកនិងការបង្កកគណនីនេះដោយ ឯកឯងបាន៕អត្ថបទ៖ សុភាព