អគ្គលេខាធិការនៃអង្គការសមុទ្រអន្តរជាតិ (IMO) លោក Arsenio Dominguez បាននិយាយកាលពីថ្ងៃព្រហស្បតិ៍ថា ស្ថានភាពនៅច្រកសមុទ្រហ័រមូស តម្រូវឲ្យមានការបន្ធូរបន្ថយភាពតានតឹង ដោយសង្កត់ធ្ងន់ថា វិធីសាស្រ្តយោធាតែមួយ នឹងមិនដំណើរការទេ ហើយដំណោះស្រាយបញ្ហាសមុទ្រជាក់ស្តែង គឺត្រូវការជាចាំបាច់ ដើម្បីដោះស្រាយវិបត្តិនេះ។

យោងតាមសន្និសីទសារព័ត៌មានដែលចេញផ្សាយនៅលើគេហទំព័រផ្លូវការរបស់ IMO លោក Dominguez បានធ្វើការអត្ថាធិប្បាយនេះ ខណៈពេលកំពុងចូលរួមកិច្ចប្រជុំអនឡាញស្តីពីស្ថានភាពនៅច្រកសមុទ្រ     ហ័រមូស ដែលរៀបចំដោយការិយាល័យការបរទេស សហព័ន្ធ និងអភិវឌ្ឍន៍អង់គ្លេស ដោយមានរដ្ឋមន្ត្រីការបរទេសមកពីប្រទេសជាង ៤០ ចូលរួម។

ក្នុងអំឡុងពេលនៃកិច្ចប្រជុំ លោក Dominguez បានជម្រាបជូនអ្នកចូលរួមអំពីកិច្ចខិតខំប្រឹងប្រែងជាបន្តបន្ទាប់របស់IMO។ លោកបានជំរុញឲ្យរដ្ឋនានាគាំទ្រកិច្ចខិតខំប្រឹងប្រែងការទូត ដើម្បីធានាបាននូវការជម្លៀសនាវិកប្រហែល ២០.000នាក់ ដែលជាប់ខ្លួន នៅក្នុងឈូងសមុទ្រពែក្ស និងដើម្បីបើកច្រករបៀងមនុស្សធម៌សម្រាប់ជំនួយបន្ទាន់។

បន្ទាប់ពីកិច្ចប្រជុំនោះ លោក Dominguez បាននិយាយថា ការឆ្លើយតបដែលបែកបាក់ លែងគ្រប់គ្រាន់ដើម្បីដោះស្រាយវិបត្តិទៀតហើយ។ លោកបានកត់សម្គាល់ថា៖ «អ្វីដែលត្រូវការជាបន្ទាន់ គឺការចូលរួមផ្នែកការទូត ដំណោះស្រាយជាក់ស្តែង និងអព្យាក្រឹត និងសកម្មភាពរបស់អន្តរជាតិ ដែលមានការសម្របសម្រួល»។

លោកបានបន្ថែមថា IMO កំពុងជំរុញក្របខណ្ឌជម្លៀសតាមសមុទ្រ ដោយផ្អែកលើកិច្ចសហប្រតិបត្តិការរវាងរដ្ឋឆ្នេរសមុទ្រ ការធានាសន្តិសុខ និងការសម្របសម្រួលប្រតិបត្តិការ ដោយមានគោលបំណងច្បាស់លាស់ ក្នុងការដោះលែងនាវាដែលជាប់គាំង អនុញ្ញាតឲ្យមានការផ្លាស់ប្តូរវេនក្រុមនាវិកដោយសុវត្ថិភាព និងការពារគ្រោះមហន្តរាយបរិស្ថាន៕