យោធាអ៊ីស្រាអែល បាននិយាយថា ប្រព័ន្ធការពារដែនអាកាស បានឆ្លើយតបទៅនឹងរលកនៃការបាញ់មីស៊ីលរបស់អ៊ីរ៉ង់ កាលពីព្រឹកថ្ងៃព្រហស្បតិ៍ រួមទាំងការវាយប្រហារយ៉ាងហោចណាស់ពីរលើក បន្ទាប់ពីប្រធានាធិបតីអាមេរិកលោក ដូណាល់ ត្រាំ (Donald Trump) បានថ្លែងសុន្ទរកថា ទៅកាន់សាធារណជនអាមេរិកអំពីសង្គ្រាមនេះ។

បន្ទាប់ពីការវាយប្រហារលើកដំបូង នគរបាលបាននិយាយថា មន្ត្រីត្រូវបានបញ្ជូនទៅកាន់កន្លែងជាច្រើនដែលត្រូវរងការវាយប្រហារ នៅភាគកណ្តាលអ៊ីស្រាអែល ដោយរបាយការណ៍ប្រព័ន្ធផ្សព្វផ្សាយ បានដាក់ចំនួនគឺ ៩កន្លែង។

ដោយដកស្រង់សម្តីគ្រូពេទ្យ របាយការណ៍ទាំងនោះ បានបញ្ជាក់ថា មនុស្ស ៤នាក់ បានរងរបួសស្រាលនៅក្នុងតំបន់ Tel Aviv។ 

ប្រព័ន្ធផ្សព្វផ្សាយអ៊ីស្រាអែល បានសន្មតថា ការខូចខាតនៅទូទាំងតំបន់ដ៏ធំទូលាយមួយ គឺដោយសារតែការប្រើប្រាស់គ្រាប់បែកចង្កោម ដែលផ្ទុះនៅលើអាកាស និងគ្រាប់បែកតូចៗ បានបែកចេញពីគ្នា។

អ៊ីរ៉ង់ និងអ៊ីស្រាអែលពីមុន បានចោទប្រកាន់គ្នាទៅវិញទៅមកថា បានប្រើប្រាស់គ្រាប់បែកចង្កោម៕