រដ្ឋធានី Nicosia របស់ប្រទេសស៊ីប ត្រូវបានគ្រប់ដណ្តប់យ៉ាងក្រាស់ដោយសំណុំធូលីវាលខ្សាច់សាហារ៉ា ស្របពេលដែលព្យុះធូលីមួយនេះបោកបកក់ឆ្លងកាត់ប្រទេសមួយនេះ ចេញពីទ្វីបអាហ្វ្រិក ។

អគារនៅទូទាំងរដ្ឋធានី គ្របដណ្តប់ដោយធូលី ខណៈពលរដ្ឋពាក់ម៉ាស់ ពេលដែលពួកគេដើរឆ្លងកាត់ដងផ្លូវ ។

ក្រសួងឧតុនិយមសាធារណរដ្ឋស៊ីប បានព្រមានថា គុណភាពខ្យល់អាចនឹងកាន់តែធ្ងន់ធ្ងរខ្លាំងនៅទូទាំងប្រទេសកោះមួយនេះ ដោយពួកគេណែនាំឲ្យពលរដ្ឋ ជាពិសេសអ្នកដែលមានបញ្ហាផ្លូវដង្ហើម ត្រូវមានការប្រុងប្រយ័ត្នទុកជាមុន ។

តំបន់ផ្សេងទៀតនៅសមុទ្រមេឌីទែរ៉ាណេ បានរងផលប៉ះពាល់ផងដែរ ក្នុងនោះផ្ទៃមេឃនៅលើកោះ Crete របស់ប្រទេសក្រិក បានប្រែជាពណ៌លឿងទុំ កាលពីថ្ងៃពុធ ក្រោយសំណុំធូលីស្រដៀងគ្នា បោកបក់ចេញពីទ្វីបអាហ្វ្រិក ៕