កាលពីថ្ងៃសៅរ៍ (ទី៤ ខែមេសា ឆ្នាំ២០២៦) មន្ត្រីបានប្រាប់ឲ្យដឹងថា ភ្នាក់ងារសហព័ន្ធអាមេរិក បានចាប់ខ្លួនក្មួយស្រី និងចៅស្រីរបស់សពមេបញ្ជាការយោធាអ៊ីរ៉ង់ លោក Qassem Soleimani បន្ទាប់ពីអ្នកការទូតជាន់ខ្ពស់របស់រដ្ឋបាលលោកប្រធានាធិបតី Donald Trump គឺលោក Marco Rubio បានដកហូតឋានៈជាអ្នករស់នៅអចិន្ត្រៃយ៍ស្របច្បាប់របស់អ្នកទាំង២។

ក្រសួងការបរទេសបានឲ្យដឹងនៅក្នុងសេចក្តីថ្លែងការណ៍មួយថា៖ «លោកស្រី Hamideh Soleimani Afshar និងកូនស្រីរបស់គាត់ ឥឡូវនេះកំពុងស្ថិតនៅក្រោមការឃុំខ្លួនរបស់ការិយាល័យអនុវត្តច្បាប់អន្តោប្រវេសន៍ និងគយសហរដ្ឋអាមេរិក ឬ ICE»។

នៅក្នុងសេចក្តីថ្លែងការណ៍ផ្ទាល់ខ្លួនរបស់លោក លើបណ្ដាញសង្គម រដ្ឋមន្ត្រីការបរទេសអាមេរិក លោក Rubio បានបញ្ជាក់ថា ទាំងម្តាយ និងកូនស្រីនេះ កំពុង «រង់ចាំការឲ្យចាកចេញ» ពីសហរដ្ឋអាមេរិក ជាការវិវត្តមួយដែលបានកើតឡើងបន្ទាប់ពីយោធាអាមេរិក និងអ៊ីស្រាអែលបានចាប់ផ្តើមធ្វើសង្គ្រាម លើអ៊ីរ៉ង់ កាលពីចុងខែកុម្ភៈ ដោយផ្នែកខ្លះលើកឡើងពីប្រវត្តិឧបត្ថម្ភភេរវកម្មរបស់អ៊ីរ៉ង់។

ហេតុការណ៍កាលពីថ្ងៃសៅរ៍នេះ ទាក់ទងនឹងលោកស្រី Soleimani Afshar ក៏បានកើតឡើងផងដែរ ខណៈដែលរដ្ឋបាលរបស់លោក Trump បានស្វែងរកការដកហូតឋានៈអន្តោប្រវេសន៍ស្របច្បាប់របស់បុគ្គលដែលខ្លួនបានកំណត់ថា មានទំនាក់ទំនងជាមួយសត្រូវរបស់សហរដ្ឋអាមេរិក។

មន្ត្រីបានចោទប្រកាន់ថា លោកស្រី Soleimani Afshar បានបង្ហាញការអបអរ ចំពោះការវាយប្រហារដោយយោធា លើបុគ្គលិកអាមេរិក និងបានសរសើរមេដឹកនាំកំពូលថ្មីរបស់អ៊ីរ៉ង់ បន្ទាប់ពីសហរដ្ឋអាមេរិក និងអ៊ីស្រាអែល បានសម្លាប់អ្នកកាន់តំណែងមុនរបស់លោក គឺលោក Ayatollah Ali Khamenei អំឡុងការវាយប្រហារតាមអាកាសទ្រង់ទ្រាយធំ នៅដើមដំបូងនៃសង្គ្រាម។ ពួកគេក៏បានចោទប្រកាន់លោកស្រីថា បានដាក់ឈ្មោះសហរដ្ឋអាមេរិកថា ជា «បិសាចដ៏ធំ»។

សេចក្តីថ្លែងការណ៍ ពាក់ព័ន្ធនឹងលោកស្រី Soleimani Afshar អះអាងបន្ថែមទៀតថា លោកស្រីបានសម្តែងការគាំទ្រយ៉ាងពេញទំហឹង ចំពោះកងឆ្មាំបដិវត្តន៍អ៊ីរ៉ង់ (IRGC) ទាំងដែលលោកស្រីរស់នៅក្នុងទឹកដីអាមេរិក។ ហើយមន្ត្រីបានបញ្ជាក់ថា បន្ថែមពីលើការដកហូតឋានៈជាអ្នករស់នៅអចិន្ត្រៃយ៍ស្របច្បាប់ ឬកាតបៃតង (Green Card) សម្រាប់លោកស្រី Soleimani Afshar និងកូនស្រី ស្វាមីរបស់លោកស្រីក៏ត្រូវបានហាមឃាត់ជាផ្លូវការមិនឲ្យចូលសហរដ្ឋអាមេរិកផងដែរ៕