អ៊ីរ៉ង់បានវាយបកវិញចំពោះការផ្ទុះកំហឹងដ៏ខ្លាំងក្លារបស់លោក Donald Trump កាលពីថ្ងៃអាទិត្យ ដោយប្រធានសភារបស់ខ្លួនបានជំរុញឱ្យប្រធានាធិបតីអាមេរិក «បញ្ចប់ល្បែងដ៏គ្រោះថ្នាក់នេះ»។

លោក Trump បានបង្កើនការគំរាមកំហែងរបស់លោកយ៉ាងខ្លាំងថានឹងវាយប្រហារហេដ្ឋារចនាសម្ព័ន្ធថាមពលដ៏សំខាន់របស់អ៊ីរ៉ង់ ដោយព្រមានទីក្រុងតេអេរ៉ង់ឱ្យ បើកច្រកសមុទ្រ Hormuz មុនថ្ងៃផុតកំណត់ថ្ងៃចន្ទនេះ ឬប្រឈមនឹងការវាយកម្ទេចប្រទេសនេះចោល។

ប្រធានសភាអ៊ីរ៉ង់លោក Mohammad Bagher Ghalibaf បានសរសេរនៅលើវេទិកាប្រព័ន្ធផ្សព្វផ្សាយសង្គម X ថា សកម្មភាពខ្វះការប្រុងប្រយ័ត្នរបស់អ្នកកំពុងអូសទាញសហរដ្ឋអាមេរិកចូលទៅក្នុងស្ថានភាពដ៏អាក្រក់បំផុតសម្រាប់គ្រួសារនីមួយៗ ហើយតំបន់ទាំងមូលរបស់ពួកលោកនឹងឆេះដោយសារតែអ្នកទទូចឱ្យធ្វើតាមបញ្ជារបស់លោក Netanyahu។ កុំយល់ច្រឡំ អ្នកនឹងមិនទទួលបានអ្វីទាំងអស់តាមរយៈឧក្រិដ្ឋកម្មសង្គ្រាមនេះទេ។

លោកបានបន្ថែមថា ដំណោះស្រាយពិតប្រាកដតែមួយគត់គឺការគោរពសិទ្ធិរបស់ប្រជាជនអ៊ីរ៉ង់ និងបញ្ចប់ល្បែងដ៏គ្រោះថ្នាក់នេះ។

ត្រឹមតែប៉ុន្មានម៉ោងបន្ទាប់ពីបញ្ជាក់ពីការជួយសង្គ្រោះអ្នកបើកយន្តហោះអាមេរិកម្នាក់ពីទឹកដីអ៊ីរ៉ង់ ប្រធានាធិបតីអាមេរិករូបនេះ និយាយថា ថ្ងៃអង្គារ នឹងក្លាយជាទិវារោងចក្រថាមពល និងទិវាស្ពាន ដែលទាំងអស់ត្រូវបានកម្ទេចចោលក្នុងពេលតែមួយ ប្រសិនបើផ្លូវទឹកសំខាន់មិនត្រូវបានបើកឱ្យនាវាដឹកប្រេងឆ្លងកាត់ឡើងវិញនោះទេ៕