តម្លៃប្រេងបានកើនឡើង មូលបត្របំណុលបានធ្លាក់ចុះ ហើយភាគហ៊ុន ប្រែប្រួលមិនទៀងទាត់ នៅពេលចាប់ផ្តើមការជួញដូរនៅអាស៊ីនៅថ្ងៃចន្ទទី៦មេសាដើមសប្ដាហ៍នេះ ខណៈប្រធានាធិបតីអាមេរិកលោក Donald Trump បានសន្យាថាវាយកម្ទេចប្រទេសចោល ប្រសិនបើទីក្រុងតេអេរ៉ង់ មិនបំពេញតាមកាលកំណត់របស់លោកឲ្យបើកច្រកសមុទ្រ Hormuz ឡើងវិញ ទេនោះ។

ការគំរាមកំហែងម្តងហើយម្តងទៀតរបស់លោក Trump ក្នុងការបំផ្លាញហេដ្ឋារចនាសម្ព័ន្ធស៊ីវិល រួមទាំងរោងចក្រថាមពល និងស្ពាន ប្រសិនបើផ្លូវទឹកដ៏សំខាន់មិនត្រូវបានបើកនៅថ្ងៃអង្គារស្អែកនេះ បានធ្វើឱ្យពាណិជ្ជករមានការព្រួយបារម្ភចំពោះការវាយប្រហារទៅវិញទៅមកដោយអ៊ីរ៉ង់លើគោលដៅនៅក្នុងរដ្ឋឈូងសមុទ្រ។

ខណៈប្រទេសជាច្រើននៅជុំវិញតំបន់បានប្រារព្ធថ្ងៃឈប់សម្រាកនៅថ្ងៃចន្ទនេះ តម្លៃភាគហ៊ុន S&P 500 បានធ្លាក់ចុះ ០,២ភាគរយ ហើយសន្ទស្សន៍ទូលំទូលាយបំផុតរបស់ MSCI នៃភាគហ៊ុនអាស៊ីប៉ាស៊ីហ្វិកនៅខាងក្រៅប្រទេសជប៉ុនបានកើនឡើង ០,៥ ភាគរយ។ 

សន្ទស្សន៍Nikkei 225 បានកើនឡើង ១,២ ភាគរយ ខណៈដែល Kospi របស់កូរ៉េខាងត្បូងបានកើនឡើង២ ភាគរយ។

ចំណែកតម្លៃប្រេងឆៅ Brent បានបើកជួញដូរក្នុងតម្លៃខ្ពស់ជាងមុន ដោយកើនឡើង១,៤ ភាគរយដល់១១០,៥៨ ដុល្លារអាមេរិកក្នុងមួយបារ៉ែល បន្ទាប់ពីសមាជិកនៃក្រុមប្រទេសផលិតប្រេង OPEC+ បានយល់ព្រមកាលពីថ្ងៃអាទិត្យ ដើម្បីបង្កើនកូតាទិន្នផលប្រេងរបស់ខ្លួនចំនួន ២០៦.០០០ បារ៉ែលក្នុងមួយថ្ងៃសម្រាប់ខែឧសភា៕