កាលពីថ្ងៃអាទិត្យ (៥ មេសា) រុស្ស៊ី បានសម្តែងក្តីសង្ឃឹមថា កិច្ចខិតខំប្រឹងប្រែងដើម្បីកាត់បន្ថយភាពតានតឹងក្នុងជម្លោះអ៊ីរ៉ង់ នឹងទទួលបានផ្លែផ្កា ហើយបានលើកឡើងថា សហរដ្ឋអាមេរិក នឹងរួមចំណែកដល់រឿងនេះ តាមរយៈ «ការបោះបង់ចោលនូវភាសាដាក់ឱសានវាទរបស់ខ្លួន ហើយងាកទៅដោះស្រាយជម្លោះតាមរយៈកិច្ចចរចាវិញ»។

ប្រធានាធិបតីអាមេរិក លោក Donald Trump បានប្រាប់កាសែត Wall Street Journal កាលពីថ្ងៃអាទិត្យថា ឱសានវាទរបស់លោកសម្រាប់អ៊ីរ៉ង់ ក្នុងការបើកច្រកសមុទ្រហ័រមូស គឺនៅល្ងាចថ្ងៃអង្គារ ទី៧ ខែមេសា ស្អែកនេះ ហើយបើទីក្រុងតេអេរ៉ង់ មិនបើកច្រកសមុទ្រនេះទេ អ៊ីរ៉ង់នឹងប្រឈមការវាយស្រោចលើហេដ្ឋារចនាសម្ព័ន្ធសំខាន់ៗយ៉ាងខ្លាំងក្លាបំផុត។

សេចក្តីថ្លែងការណ៍ដែលចេញផ្សាយដោយក្រសួងការបរទេសរុស្ស៊ី បានធ្វើឡើងបន្ទាប់ពីកិច្ចសន្ទនារវាងរដ្ឋមន្ត្រីការបរទេសរុស្ស៊ី លោក Sergei Lavrov និងរដ្ឋសមភាគីអ៊ីរ៉ង់ លោក Abbas Araqchi។

សេចក្តីថ្លែងការណ៍បន្តថា ភាគីទាំងពីរ «អំពាវនាវឱ្យមានកិច្ចប្រឹងប្រែងបញ្ចៀសសកម្មភាពទាំងឡាយណា រាប់បញ្ចូលទាំងនៅក្នុងក្រុមប្រឹក្សាសន្តិសុខអង្គការសហប្រជាជាតិ ដែលអាចប៉ះពាល់ដល់ឱកាសដែលនៅសេសសល់ ក្នុងការជំរុញកិច្ចខិតខំផ្នែកនយោបាយ និងការទូត ដើម្បីដោះស្រាយវិបត្តិ»។

សេចក្តីថ្លែងការណ៍បានបញ្ជាក់ថា រុស្ស៊ីគាំទ្ររាល់កិច្ចខិតខំប្រឹងប្រែងដើម្បីកាត់បន្ថយភាពតានតឹង «ក្នុងគោលបំណងឆ្ពោះទៅរកប្រក្រតីភាពរយៈពេលវែង និងប្រកបដោយនិរន្តរភាពនៃស្ថានភាពនៅមជ្ឈិមបូព៌ា ដែលចំណុចនេះនឹងកាន់តែប្រសើរឡើង ប្រសិនបើសហរដ្ឋអាមេរិក បោះបង់ចោលនូវភាសានៃការដាក់ឱសានវាទ ហើយបង្វែរស្ថានភាពឱ្យទៅរកផ្លូវនៃការចរចាវិញ»៕