ទោះបីជាភាគីទាំង២ បានបង្ហើបពីការមានទំនាក់ទំនងការទូតដែលកំពុងបន្តក៏ដោយ ក៏ភាពតានតឹងនៅតំបន់មជ្ឈិមបូព៌ា បានបន្តកើនឡើងនៅថ្ងៃអាទិត្យ (ទី៥ ខែមេសា ឆ្នាំ២០២៦) ខណៈដែលអ៊ីរ៉ង់អះអាងថា ខ្លួនបានបាញ់ទម្លាក់យន្តហោះអាមេរិកប្រភេទផ្សេងៗគ្នាចំនួន ១២គ្រឿង ចាប់តាំងពីថ្ងៃទី៣ ខែមេសា ខណៈដែលប្រធានាធិបតីអាមេរិក លោក Donald Trump បានគំរាមវាយប្រហាររោងចក្រថាមពល និងស្ពានរបស់អ៊ីរ៉ង់ បន្ទាប់ពីបានបង្ហាញពីសញ្ញាពន្យារពេលមួយផ្សេងទៀត ចំពោះឱសានវាទរបស់លោក ជុំវិញការបើកច្រកសមុទ្រ Hormuz។

ទីក្រុងតេអេរ៉ង់ បានបញ្ជាក់ជាថ្មីកាលពីថ្ងៃអាទិត្យថា ខ្លួននឹងបន្តប្រើប្រាស់ការគ្រប់គ្រងរបស់ខ្លួន លើច្រកសមុទ្រ Hormuz ដែលជាផ្លូវតូចចង្អៀតដ៏សំខាន់ សម្រាប់ថាមពលសកល ជាឧបករណ៍យុទ្ធសាស្ត្រ ក្នុងការប្រឈមមុខដាក់គ្នា។ អនុប្រធានផ្នែកទំនាក់ទំនង នៅការិយាល័យប្រធានាធិបតីអ៊ីរ៉ង់ លោក Mehdi Tabatabaei បាននិយាយថា អ៊ីរ៉ង់នឹងបើកច្រកសមុទ្រនេះឡើងវិញ លុះត្រាតែទទួលបានសំណង សម្រាប់ការខូចខាតដោយសារសង្គ្រាម។ លោកបានបញ្ជាក់ថា សំណងនឹងត្រូវបង់ពីចំណូលពន្ធលើនាវា។

ទន្ទឹមនឹងនេះដែរ លោក Trump បានពន្យារពេលកំណត់ដែលលោកបានដាក់ សម្រាប់អ៊ីរ៉ង់ ដើម្បីបើកច្រកសមុទ្រឡើងវិញ មួយថ្ងៃទៀត។ លោកបានព្រមានថា ប្រសិនបើទីក្រុងតេអេរ៉ង់មិនអនុវត្តតាមនៅល្ងាចថ្ងៃទី៧ ខែមេសា សហរដ្ឋអាមេរិកនឹងកំណត់គោលដៅរោងចក្រថាមពល និងស្ពានរបស់អ៊ីរ៉ង់។

ក្នុងពេលជាមួយគ្នានេះ លោក Trump បាននិយាយថា ទីក្រុងវ៉ាស៊ីនតោនកំពុងចូលរួមក្នុង «ការចរចាដ៏ប្រាកដប្រជា» ជាមួយអ៊ីរ៉ង់ ហើយបានលើកឡើងថា កិច្ចព្រមព្រៀងមួយ អាចសម្រេចបាន នៅមុនថ្ងៃផុតកំណត់។ តែទោះជាយ៉ាងណាក្ដី លោកក៏បានព្រមានផងដែរថា ការបរាជ័យមិនឈានដល់កិច្ចព្រមព្រៀងអាចនាំឲ្យមានផលវិបាកយ៉ាងធ្ងន់ធ្ងរ៕