បើយោងតាមទិន្នន័យ និងរបាយការណ៍ប្រព័ន្ធផ្សព្វផ្សាយរបស់កោះ បានឲ្យដឹងថា ចំនួនយន្តហោះយោធា និងបាឡុងរបស់ប្រទេសចិន ដែលហោះនៅក្បែរៗកោះតៃវ៉ាន់ ក្នុងខែមីនា បានថយចុះពាក់កណ្តាល បើធៀបនឹងឆ្នាំមុន ដោយការធ្លាក់ចុះនេះអាចជាប់ទាក់ទងនឹងដំណើរទស្សនកិច្ចរបស់ប្រធានាធិបតីអាមេរិក លោក Donald Trump ទៅកាន់ប្រទេសចិន ដែលដើមឡើយត្រូវបានគ្រោងមាននៅខែមេសា។

នៅក្នុងចំណាត់ការដ៏កម្រមួយ សម្រាប់យោធាចិន ដែលបានតែងបញ្ជូនស្ទើរតែរាល់ថ្ងៃនូវយន្តហោះធ្វើសង្គ្រាមរបស់ខ្លួនឲ្យទៅកៀកនឹងដែនដីស្វ័យគ្រប់គ្រងនោះ គ្មានយន្តហោះណាមួយមកពីដីគោក ត្រូវបានប្រទះឃើញរយៈពេល ១១ថ្ងៃ នៅក្នុងខែមីនា បន្ទាប់ពីមានរយៈថ្ងៃបែបនេះ ៥ថ្ងៃ នៅក្នុងខែកុម្ភៈ។

យោធាចិនមិនបានផ្តល់ការពន្យល់អ្វីឡើយ សម្រាប់ការកាត់បន្ថយចំនួនយន្តហោះ ដែលត្រូវហោះនៅជិតកោះតៃវ៉ាន់នេះ។ តែអ្នកវិភាគមួយចំនួន បានសន្និដ្ឋានថា ទីក្រុងប៉េកាំងកំពុងព្យាយាមសន្សំសំចៃប្រេងឥន្ធនៈ ក្នុងអំឡុងពេលមានការកើនឡើងនូវតម្លៃប្រេងឆៅ ដោយសារតែសង្គ្រាមអាមេរិក-អ៊ីស្រាអែល លើអ៊ីរ៉ង់។

ការរាប់ប្រចាំថ្ងៃដែលចេញផ្សាយដោយអាជ្ញាធរការពារដែនកោះតៃវ៉ាន់ បានបង្ហាញថា យន្តហោះទម្លាក់គ្រាប់បែក យន្តហោះចម្បាំង យានដ្រូន និងបាឡុងរបស់ចិនសរុបចំនួន ១៦០គ្រឿង បានហោះហើរនៅក្បែរកោះនេះ ក្នុងខែមីនា ដោយមានយន្តហោះជាមធ្យម ៥,២គ្រឿង ក្នុងមួយថ្ងៃ៕