ភ្នំពេញ៖ ខណៈពិធីបុណ្យចូលឆ្នាំខ្មែរប្រពៃណីជាតិ ខិតជិតមកដល់ មន្រ្តីជំនាញ នៃក្រសួងសុខាភិបាល បានក្រើនរម្លឹកដល់ពលរដ្ឋ ឱ្យខិតខំអនុវត្តវិធានសុខាភិបាល ដើម្បីទប់ស្កាត់ការឆ្លងជំងឺកូវីដ-១៩។

លោកជំទាវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការ ចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស កាលពីម្សិលមិញ បានលើក ឡើងថា ដើម្បីទប់ស្កាត់ការឆ្លងជំងឺកូវីដ-១៩ ក្នុងឱកាសពិធីបុណ្យចូលឆ្នាំខ្មែរប្រពៃណីជាតិ ដែល​ខិតជិត ចូលមកដល់នេះ ​គឺប្រជាពលរដ្ឋ ត្រូវអនុវត្តវិធានសុខាភិបាល និងវិធានការ៣កុំ ៣ការពារ បើទោះបីពេលនេះ ស្ថានភាពជំងឺនេះនៅកម្ពុជា មានភាពធូរស្រាលហើយក្តី តែមិនត្រូវ​ធ្វេសប្រហែស​នោះទេ។

សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានប្រកាសថា ​នៅក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលនឹងចូលមកដល់ក្នុងពេលដ៏ខ្លីខាងមុខនេះ ប្រជាពលរដ្ឋ អាចដើរលេងកម្សាន្ត សប្បាយរីករាយ ​បន្ទាប់ពីខកខានអស់រយៈពេល២ឆ្នាំ ​ដោយសារការរាតត្បាតនៃជំងឺកូវីដ-១៩។ តែសម្តេចតេជោ បានបង្ហាញនូវការសោកស្តាយចំពោះតម្លៃសាំងមានការឡើងថ្លៃ ដែលអាច​នាំ​ឲ្យ​មានការប៉ះពាល់ ​ដល់ការចំណាយ ​ក្នុងការធ្វើដំណើររបស់ប្រជាពលរដ្ឋ ​នាឱកាសបុណ្យចូលឆ្នាំថ្មី។ ការកើនឡើងនៃតម្លៃ ​សាំងនេះ​ មិនមែនកើតមានចំពោះតែកម្ពុជានោះទេ ពោលគឺប្រទេសនានា​ទូទាំង​ពិភពលោក ​រងផលប៉ះពាល់ដូចគ្នា ​ដោយសារវិបត្តិសង្គ្រាមរុស្ស៉ី និងអ៊ុយក្រែន៕ អត្ថបទ៖ទូច សោភ័ណ