រូបភាពនៃប្រាសាទបុរាណដែលហ៊ុមព័ទ្ធដោយដើមឈើធំៗ និងសម្រស់ធម្មជាតិដ៏អាថ៌កំបាំងនៃ ប្រាសាទបេងមាលាពេលនេះ កាន់តែបង្កើនភាពទាក់ទាញទ្វេដង ក្នុងពេលដែលអាជ្ញាធរជាតិអប្សរាបានបញ្ចប់ការជួសជុល«ស្ពានឈើថ្មើរជើង» ជាស្ថាពរ ដើម្បីរង់ចាំទទួលស្វាគមន៍ភ្ញៀវទេសចរជាតិ និងអន្តរជាតិ នាពេលចូលឆ្នាំថ្មីនេះ។ 

បទពិសោធន៍ថ្មីលើដងស្ពាន ដែលមានទំហំធំទូលាយជាងមុន សុវត្ថិភាពជាងមុន គឺស្ពានឈើថ្មីដែលមានប្រវែងសរុបដល់ទៅ១៨៩ម៉ែត្រនេះ មិនត្រឹមតែជាច្រកសម្រាប់ដើរទស្សនាប៉ុណ្ណោះទេ ប៉ុន្តែគឺជា«មគ្គុទ្ទេសក៍ឈើ» ដែលនឹងនាំលោកអ្នកលម្ហែកាយចេញពីទិសខាងត្បូង ឆ្ពោះទៅកាន់បេះដូងនៃប្រាសាទ។ ជាមួយនិងការរចនាបង្គុំតាមបទដ្ឋានបច្ចេកទេសយ៉ាងសម្រិតសម្រាំង ស្ពាននេះត្រូវបានពង្រីកទទឹងឱ្យកាន់តែធំទូលាយ (ចាប់ពី ១.៣០ម៉ែត្រ ដល់១.៧០ម៉ែត្រ) ដែលផ្ដល់ភាពងាយស្រួលក្នុងការដើរទស្សនា និងថតរូបកម្សាន្តដោយមិនមានភាពរអាក់រអួល។ នេះ គឺជាការលះបង់ដើម្បីកេរដំណែលដូនតា ក្រោមការលះបង់កម្លាំងកាយចិត្តអស់រយៈពេលជិត៧ខែ ។ 

លោក ពុទ្ធ សុទ្ធ ប្រធានគ្រប់គ្រងគម្រោងនៃអាជ្ញាធរជាតិអប្សរា បានបញ្ជាក់ថា ស្ពានថ្មីនេះ បានជំនួសឱ្យស្ពានចាស់ដែលធ្លាប់ទ្រុឌទ្រោមដោយសារអាយុកាល និងអាកាសធាតុ។ ការជួសជុល ត្រូវបានបញ្ចប់ជាស្ថាពរនៅដើមខែមេសា ឆ្នាំ២០២៦នេះ ដើម្បីធានាបាននូវសុវត្ថិភាពកម្រិតខ្ពស់បំផុតសម្រាប់ភ្ញៀវទេសចរគ្រប់ជាតិសាសន៍។

ការបង្កើតភាពសុខដុមរមនារវាង «ស្ថាបត្យកម្ម និងធម្មជាតិ» ដែលជាតម្លៃទេសភាពប្រាសាទបេងមាលា ត្រូវបានគេស្គាល់ថាជា«ប្រាសាទក្នុងព្រៃ» ដែលមានសោភ័ណភាពប្លែកពីគេ។ ស្ពានឈើថ្មីនេះត្រូវបានរៀបចំឡើងយ៉ាងមានសណ្តាប់ធ្នាប់ ដើម្បីឱ្យភ្ញៀវទេសចរអាច៖

- ផ្តិតយកទិដ្ឋភាពពីលើអាកាស៖ មើលឃើញក្បូរក្បាច់ចម្លាក់ដ៏វិចិត្រ និងគំនរថ្មដែលប្រកប ដោយមន្តស្នេហ៍ពីលើស្ពាន។

- បង្ហាញជូនភ្ញៀវនូវអារម្មណ៍ស្រស់ស្រាយ ក្នុងដំណើរកម្សាន្តក្រោមម្លប់ឈើត្រឈឹងត្រឈៃ ប្រៀបដូចជាការដើរក្នុងឋានសួគ៌បុរាណ។

- យើងបង្កើតភាពងាយស្រួលលើដងស្ពាន ដោយបំពាក់ជណ្តើរ និងផ្លូវដើរថ្មី ជួយឱ្យការទស្សនាប្រាសាទមហិមានេះកាន់តែមានភាពងាយស្រួល និងអារម្មណ៍រំភើប។ 

តើលោកអ្នក បានត្រៀមខ្លួនហើយឬនៅ? ដើម្បីទៅទទួលយកបទពិសោធន៍ថ្មី នៅលើស្ពានឈើថ្មី ក្នុងទឹកដីនៃប្រាសាទបេងមាលា នាពេលបុណ្យចូលឆ្នាំថ្មីនេះ។ សម្រស់ដ៏អាថ៌កំបាំងនៃអតីតកាល កំពុងរង់ចាំលោកអ្នកទៅស្វែងរកហើយ៕ រូបអាជ្ញាធរអប្សរា