ល្បែងប្រជាប្រិយជាតិជាច្រើន ត្រូវបានយកទៅលេងកម្សាន្តនៅក្នុងកម្មវិធីសង្ក្រាន្តនានា តាមថ្នាក់មូលដ្ឋាន ក្នុងរាជធានីភ្នំពេញ ។ 

កាលពីវេលាល្ងាចថ្ងៃទី០៩ ខែមេសា ឆ្នាំ២០២៦ គណៈកម្មការគ្រប់គ្រងផ្សារតាម៉ាប់ព្រែកជ្រៃ បានរៀបចំកម្មវិធីសង្ក្រាន្តផ្សារ ដើម្បីជាការអបអរសាទរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៦ ដោយមានការអញ្ជើញចូលរួមពីបងប្អូនជាអាជីវករក្នុងផ្សារជាច្រើនផងដែរ ។ 

លោកខាវ ថន ប្រធានគ្រប់គ្រងផ្សារតាម៉ាប់ព្រែកជ្រៃ ឲ្យដឹងថា ៖ កម្មវិធីសង្ក្រាន្តនេះ គឺរៀបចំឡើងតាមរយៈការមូលមតិគ្នាជាថ្លុងមួយដោយគណៈគ្រប់គ្រងផ្សារ និងបងប្អូនអ្នកលក់ដូរ ដើម្បីចូលរួមចំណែកក្នុងការថែរក្សាបាននូវទំនៀមទំលាប់ វប្បធម៌ប្រពៃណីរបស់ប្រទេសជាតិ ស្របពេលដែលស្រុកទេសកំពុងឋិតក្នុងយុគ្គសម័យអភិវឌ្ឍន៍ ក្រោមម្លប់ដ៏ត្រជាក់ត្រជុំ នៃសុខសន្តិភាព ។ 

ក្រុមអាជីវករដែលបានចូលរួមកម្សាន្ត ពិតជារីករាយកម្សាន្តជាមួយការលេងល្បែងប្រពៃណីរបស់ជាតិ ដែលជាកេរ្តិ៍បន្សល់ទុកមកពីបរមបុរាណឲ្យគ្រប់ជន្មានុជនទាំងអស់ អាចកម្សាន្តបាន ដោយលេងដោយសីលធម៌ និងការគោរពគ្នាទៅមក ។ 

គួរបញ្ជាក់ថា ៖ ឆ្នាំនេះ នៅរាជធានីភ្នំពេញ គឺជាគោលដៅធំសំខាន់ ក្នុងការរៀបចំព្រឹត្តិការណ៍ “ នគរសង្ក្រាន្ត “ ដើម្បីអបអរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលនឹងធ្វើឡើងរយៈពេល០៦ថ្ងៃ គិតចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ ។ 

គោលដៅធំៗទាំង០៦ រួមមាន ៖ រមណីយដ្ឋានវប្បធម៌ប្រវត្តិសាស្ត្រវត្តភ្នំ , ផ្លូវថ្មើរជើងចតុមុខ (Walk street) , សួនវត្តបទុមវតី , ផ្សារទួលទំពូង , សួនច្បារវឌ្ឍនៈ ដល់ផ្សារាត្រី និង ទីតាំងបាសាក់លែន ៕ 

អត្ថបទ ៖ លីហេង