ភូមិវប្បធម៌ ជាផ្នែកមួយនៃព្រឹត្តិការណ៍នគរសង្ក្រាន្ត ដែល​រៀបចំ​ឡើង​ដើម្បី​អបអរ​សាទរ​ពិធី​បុណ្យ​ចូល​ឆ្នាំ​ប្រពៃណីជាតិខ្មែរ។ ភូមិវប្បធម៌ រៀបចំឡើងនៅពីក្រោយផ្សាររាត្រី ដែលនឹងមាន​ជា​សកម្មភាព​ជា​ច្រើន​ពាក់ព័ន្ធនឹងវប្បធម៌ រស់នៅរបស់ប្រជាពលរដ្ឋខ្មែរ ហើយក៏មានសកម្ម​ភាព​ធ្វើ​នំ​អន្សម​ នំខ្ញី អំបុក សម្រាប់ជូនដល់វីរកងទ័ព និងប្រជាពលរដ្ឋភៀសសឹកផងដែរ។

គិតមកត្រឹមថ្ងៃនេះ ផ្ទះសិប្បកម្ម បរិវេណគំនូរលើមុខ ផ្សារភូមិ ឆាកសម្ដែង សាលាឆទាន បរិវេណ​កម្ម​វិធី​អុក​ចត្រង្គ ផ្ទះនំខ្មែរ ផ្ទះសេដ្ឋីនី និងទីធ្លាសម្រាប់លេងល្បែងប្រជាប្រិយខ្មែរ នៅក្នុង​ភូមិ​វប្បធម៌​ ត្រូវបានលេចចេញជារូបរាងយ៉ាងស្រស់ស្អាតហើយ។ ក្រុមជាងក៏កំពុងមមាញឹក ក្នុង​ការ​បង្ហើយ​រាល់​កិច្ច​ការ​នៅសល់ ឱ្យចប់សព្វគ្រប់ផងដែរ។

លើសពីការបង្ហាញវប្បធម៌រស់នៅរបស់ប្រជាពលរដ្ឋខ្មែរ ភូមិវប្បធម៌នៅក្នុងឆ្នាំនេះ ក៏នឹ​ង​ប្រើ​ប្រាស់​ផ្ទះ​នំ​ខ្មែរ សម្រាប់សាធារណជន ចូលរួមធ្វើនំអន្សម នំខ្ញី និងអំបុក សម្រាប់ជូនដល់វីរកងទ័ព និង​ប្រជា​ពលរដ្ឋ​ភៀសសឹក។

នេះជាសកម្ម​ភាព​សំខាន់មួយ ក្នុងការផ្សារភ្ជាប់ប្រជាពលរដ្ឋជួរក្រោយ ទៅនឹងវីរកងទ័ពជួរមុខ និង​ប្រជា​ពលរដ្ឋភៀសសឹក ដែលស្របទៅនឹងពាក្យស្លោករបស់ ស.ស.យ.ក ដែលតែងលើកឡើងថា “ស្មារ​តី​នៅជាមួយជាតិ កងកម្លាំង និងជនភៀសសឹកគ្រប់វេលា”។

សម្រាប់ពលរដ្ឋ​ដែល​បានចូលមកទស្សនាថតកម្សាន្ត នៅក្នុងបរិវេណភូមិវប្បធម៌ នៅថ្ងៃនេះ ក៏បាន​កោត​សសើរចំពោះការរៀបចំយ៉ាងស្រស់ស្អាតនេះដែរ។ ពេញចិត្តនឹងការរៀបចំ ការ​តុប​តែង ហើយក៏ពេញចិត្ត ក្នុងដាក់ចេញសកម្មភាពផ្សារភ្ជាប់ទៅនឹងវីរកងទ័ព និងប្រជា​ពលរដ្ឋ​ភៀស​សឹក ​ដែលបង្ហាញពីការដឹងគុណ បង្ហាញពីសាមគ្គីភាពក្នុងនាមជាប្រជាជនខ្មែរតែមួយ។

គួរបញ្ជាក់ថា ព្រឹត្តិការណ៍នគរសង្ក្រាន្ត ជាកម្មវិធីដែលសហភាពសហព័ន្ធយុវជនកម្ពុជា រៀប​ចំ​ឡើង​ ដើម្បីសាទរពិធីបុណ្យចូលឆ្នាំប្រពៃណីជាតិខ្មែរ។ កម្មវិធីរយៈពេល ៦ថ្ងៃ ផ្ដើមពីថ្ងៃទី ១៤ ដល់​ថ្ងៃ​ទី ១៩ ខែមេសា ផ្តោតសំខាន់លើ ការផ្សព្វផ្សាយវប្បធម៌ប្រពៃណីជាតិ ផ្តោតលើស​កម្ម​ភាព​សេដ្ឋកិច្ច ​ក៏ដូចជាស្មារតីសាមគ្គីភាពជាតិ ពិសេសគឺផ្សារភ្ជាប់​ប្រជាពលរដ្ឋ​ខ្មែរ​ជួ​រ​ក្រោយ​ទៅ​នឹងអ្ន​ក​នៅ​ជួរ​មុខ នៅតាមបណ្ដោយព្រំដែន។ រាល់ចំណូល ដែល ស.ស.យ.ក ទទួលបាន​ពី​ការ​លក់​វត្ថុ​អនុស្សាវ​រីយ៍​ទាំងអស់ នឹងផ្ដល់ជូនទៅអ្នកនៅជួរមុខទាំងអស់៕ អត្ថបទ៖ គឹម ហុក