ភ្ញៀវទេសចរអន្តរជាតិ ដែលបានដើរកម្សាន្តនៅក្នុងកម្ពុជា ក្នុងអំឡុងពេលនេះ គឺ​បាន​មើល​ឃើញ​សកម្មភាព​រស់​រវើកការតុបតែង លម្អរទៅតាមទំនៀមទំលាប់ ប្រពៃណីរបស់ខ្លួន ដើម្បីអបអរ​សាទរ​ពិធី​បុណ្យ​ចូល​ឆ្នាំថ្មី ប្រពៃណីខ្មែរ ដែលនឹងឈានចូលមកដល់នៅសប្តាហ៍ក្រោយនេះ ហើយ​សកម្ម​ភាព​នេះ ​បានធ្វើឲ្យគេមានពេញចិត្ត និងមានភាពទាក់ទាញខ្លាំង ដោយស្គាល់​យល់​ដឹង​អំពី​អត្ត​សញ្ញាណ​វប្បធម៌​ខ្មែរកាន់តែច្បាស់ និងធនាបាននូវការថែរក្សា អភិរក្សមានភាពរឹងម៉ាំ។

ភ្ញៀវទេសចរអន្តរជាតិមកពីតាមបណ្តាប្រទេស បានថ្លែងប្រាប់BTV នៅថ្ងៃទី១១ ខែមេសានេះថា ការ​ដើរ​ទស្សនាកម្សាន្តនៅកម្ពុជា ក្នុងរយៈពេលនេះ សម្គាល់ឃើញថា គ្រប់គោលដៅទេសចរណ៍ សួន​ច្បារ​សាធារណៈ វត្តអារ៉ាម ផ្សារ សាលារៀន តាមមូលដ្ឋានអាជីវកម្ម និងតាមផ្ទះ​របស់​ពលរដ្ឋ​ជា​ដើម គឺមានតុបតែងលម្អរ បង្ហាញអត្តសញ្ញាណវប្បធម៌ខ្មែរ អបអរសាទរបុណ្យចូលឆ្នាំ ដែល​មាន​ភាព​ទាក់​ទាញខ្លាំង ហើយទេសចរអន្តរជាតិដែលដល់ថ្ងៃត្រូវត្រឡប់ប្រទេសកំណើតរបស់ខ្លួន ក៏​បាន​បង្ហាញការសោកស្តាយខ្លាំងដែរ ដែលមិនបាន​ស្នាក់​នៅ​ដើរ​កម្សាន្ត​នៅ​រាជ​ធានី​ភ្នំពេញ​រហូត​ដល់​ថ្ងៃ​បុណ្យ​ចូលឆ្នាំថ្មី ដើម្បីមើលពីការសប្បាយរបស់ពលរដ្ឋខ្មែរ នៅក្រោមតុបតែង លម្អរ​ដ៏​ស្រស់​​ស្អាត​ទាំងអស់នេះ។

យ៉ាងណាភ្ញៀវទេសចរអន្តរជាតិនានា បានថ្លែងថា គេនឹង​ជួយ​ផ្សព្វ​ផ្សាយ​អំពី​គោល​ដៅ​ទេសចរណ៍​កម្ពុជា​​និយាយអំពីបទពិសោធន៍ការដើរកម្សាន្ត និងការទទួលបានចំណេះដឹងរឿងរ៉ាវប្រវត្តិសាស្ត្រ វប្បធម៌​បែប​អច្ឆរិយៈ មានភាពសំបូរបែប ពលរដ្ឋមានភាពស្នាមញញឹម ទឹកមុខសប្បាយរីករាយ អំឡុ​ង​ថ្ងៃ​បុណ្យចូលឆ្នាំថ្មី ប្រពៃណីខ្មែរ នៅប្រទេសគេ ដើម្បីជំរុញ​ការ​ទាក់​ទាញ​ទេសចរ​អន្តរជាតិ​នានា​មក​ទស្សនា​កម្ពុជា។

សូមបញ្ជាក់ថា ដើម្បីអបអរសាទរពិធីបុណ្យចូលឆ្នាំថ្មី ប្រពៃណីខ្មែរ ឆ្នាំមមី ឆ្នាំ២០២៦ នឹង​ឈាន​ចូល​មក​ដល់​នៅថ្ងៃអង្គារ៍សប្តាហ៍ក្រោយនេះ សហភាពសហព័ន្ធយុវជនកម្ពុជា បាន​សហការ​ជា​មួយ​អាជ្ញាធរមូលដ្ឋាននៅរាជធានីភ្នំពេញ រៀបចំព្រឹត្តិការណ៍នគរសង្ក្រាន្តរយៈពេល៦ថ្ងៃ ចាប់​ពី​ថ្ងៃ​ទី​១៤ ​ដល់ថ្ងៃទី១៩ ខែមេសានេះ ដោយមានការ​រៀបចំ​កម្ម​វិធី​បង្ហាញ​ទស្សនីយ​ភាព​តាម​បែប​វប្បធម៌ ​សិល្បៈ សាសនា ប្រមាណជាង២០ទស្សនីយភាពធំៗ និងមានកម្ម​វិធី​កម្សាន្ត​សប្បាយ​ជា​ច្រើន​ទៀត ​ដែលមានតាមគោលដៅធំៗរួមមាន៖ រមណីយដ្ឋានវប្បធម៌ ប្រវត្តិសាស្ត្រវត្តភ្នំ ភូមិ​វប្បធម៌​នៅ​ជិត​ផ្សារ​រាត្រី សួនច្បារវឌ្ឍនៈ អតីតសួនទីលានធិបតេយ្យ តំបន់ផ្លូវថ្មើជើងចតុមុខ និង​បរិវេណ​ផ្សារ​ទួលទំពូងជាដើម៕ អត្ថបទ ស៊ុម សុខជា