នៅតាមបណ្តាសាកលវិទ្យាល័យនានាក្នុងរាជធានីភ្នំពេញ បានរៀបចំលេងល្បែងប្រជាប្រិយខ្មែរ អបអរ​ពិធី​បុណ្យចូលឆ្នាំថ្មី ដែលមានការចូលរួមពីប្រជាពលរដ្ឋ ជាពិសេសយុវជន ចូលរួម​សប្បាយ​រីក​រាយ​មុន​ឱកាស​ឆ្នាំថ្មីចូលមកដល់ និងដើម្បីចូលរួមលើកតម្កើងអត្តសញ្ញាណវប្បធម៌ខ្មែរ។

នៅថ្ងៃទី១០ ខែមេសា ឆ្នាំ២០២៦នេះ សាកលវិទ្យាល័យភូមិន្ទភ្នំពេញ សហការជាមួយ សហភាព​សហព័ន្ធ​យុវជន​កម្ពុជា បានរៀបចំប្រារព្ធកម្មវិធីសង្រ្កាន្តអបអរឆ្នាំថ្មី តាមទំនៀមទម្លាប់ សាសនា​ផ្សា​ភ្ជាប់​នឹងប្រពៃណី ដោយមាននិមន្តព្រះសង្ឃសូត្រមន្ត ពូនភ្នំខ្សាច់ ការសម្ដែង​របាំត្រុដិ​សុំ​សិរី​សួស្ដី ​សរសេរសំណេរថ្លែងអំណរគុណកងទ័ព និងលេងល្បែងប្រជាប្រិយខ្មែរ។

ឯកឧត្តម ជេត ជាលី សាកលវិទ្យាធិការ នៃសាកលវិទ្យាល័យភូមិន្ទភ្នំពេញ បានប្រាប់ BTV នៅ​ថ្ងៃ​នេះ​ថា សាកលវិទ្យាល័យតែងតែរៀបចំសង្រ្កាន្តរាល់ឆ្នាំ ដើម្បីអបអរឆ្នាំថ្មី និងជាការបណ្ដុះ​ផ្សព្វ​ផ្សាយ​មរតក​វប្បធម៌ ប្រពៃណីរបស់ខ្មែរ។ ហើយសម្រាប់ឆ្នាំ២០២៦នេះ សង្រ្កាន្តប្រព្រឹត្ត​ទៅ​ជា​ធម្មតា ​តែភ្ជាប់ជាមួយការរំលឹកគុណ វិរកងទ័ពដែលតស៊ូការពារជាតិ និងប្រជាជន​ប្រឆាំង​ការ​ឈ្លាន​របស់​ថៃ។

ចំណែកក្រុមយុវជន ដែលបានចូលរួមលេងល្បែងប្រជាប្រិយ បានលើកឡើងថា ការ​លេង​ល្បែង​ប្រជាប្រិយ​នេះ ​មិនមែនគ្រាន់តែជាការលេងកម្សាន្តប៉ុណ្ណោះទេ ប៉ុន្ដែវាជាការបង្ហាញ ពីមោទន​ភាព​ជាតិ​។ ពួកគេថា នៅក្នុងសម័យកាលដែលមានឥទ្ធិពលវប្បធម៌បរទេសហូរចូលខ្លាំង ការបង្កើន​សកម្ម​ភាព​លេងល្បែងប្រជាប្រិយខ្មែរ ដូចជា វាយបោះអង្គុញវាយក្អម និងទាញព្រ័ត្រ ធ្វើឲ្យ​ពួក​គេ​មាន​អារម្មណ៍​ថា បានផ្សាភ្ជាប់កាន់តែស្អិតរមួតទៅនិងវប្បធម៌ ប្រពៃណី ទំនៀមទម្លាប់ ។

ការរៀបចំលេងល្បែងប្រជាប្រិយ ក្នុងកម្មវិធីសង្រ្កាន្ដ អបអរឆ្នាំថ្មីនេះ មិន​ត្រឹម​តែ​ជា​ការ​សប្បាយ​មួយ​ពេល​ក្នុង​ឱកាសបុណ្យទាននោះទេ ប៉ុន្ដែនេះគឺជាការដកស្រង់យក ព្រលឹងវប្បធម៌ មក​ដាក់​ក្នុង​បេះដូង​យុវជនជំនាន់ក្រោយ ឲ្យពួកគេមាន​មោទន​ភាព​នូវ​អ្វី​ដែល​ជា​មរតក​បន្សល់​ទុក​ពី​ដូន​តា​មក ​និងបន្តអភិរក្សសម្រាប់អ្នកជំនាន់ក្រោយឲ្យបានគង់វង្ស៕ អត្ថបទ ៖ លៀ ស៊ីណា