នាយករដ្ឋមន្ត្រីអ៊ីស្រាអែល Benjamin Netanyahu កាលពីថ្ងៃសៅរ៍ (ទី១១ ខែមេសា ឆ្នាំ២០២៦) បាននិយាយថា យុទ្ធនាការរួមគ្នា រវាងសហរដ្ឋអាមេរិក និងអ៊ីស្រាអែល ប្រឆាំងនឹងអ៊ីរ៉ង់ ទទួលបានជោគជ័យក្នុងការ «កម្ទេច» កម្មវិធីនុយក្លេអ៊ែរ និងមីស៊ីលបាលីស្ទិករបស់ទីក្រុងតេអេរ៉ង់។

ការអត្ថាធិប្បាយរបស់លោក Netanyahu នេះ បានកើតឡើង ក្នុងអំឡុងពេលដែលមន្ត្រីអ៊ីរ៉ង់ និងសហរដ្ឋអាមេរិក បាននិងកំពុងធ្វើកិច្ចចរចាទល់មុខគ្នា នៅក្នុងប្រទេសប៉ាគីស្ថាន ជាកិច្ចប្រឹងប្រែង ដើម្បីបញ្ចប់សង្គ្រាមមជ្ឈិមបូព៌ា។ នេះបើយោងតាមការរាយការណ៍របស់ទូរទស្សន៍រដ្ឋអ៊ីរ៉ង់។

លោក Netanyahu បានលើកឡើងនៅក្នុងសេចក្តីថ្លែងការណ៍តាមទូរទស្សន៍ថា៖ «យើងទទួលបានជោគជ័យ ក្នុងការកម្ទេចកម្មវិធីនុយក្លេអ៊ែរ និងកំទេចកម្មវិធីមីស៊ីល»។ លោកបានបន្ថែមថា៖ «សង្គ្រាមប្រឆាំងនឹងទីក្រុងតេអេរ៉ង់ ក៏បានធ្វើឲ្យភាពជាអ្នកដឹកនាំរបស់អ៊ីរ៉ង់ និងសម្ព័ន្ធមិត្តក្នុងតំបន់របស់ខ្លួន ចុះខ្សោយផងដែរ។ យើងបានឈានដល់ស្ថានភាពមួយដែលអ៊ីរ៉ង់ លែងមានទៀតហើយនូវរោងចក្រចម្រាញ់សារធាតុអ៊ុយរ៉ានីញ៉ូមដែលដំណើរការតែមួយគត់»។

លោក Netanyahu បាននិយាយថា សហរដ្ឋអាមេរិក និងអ៊ីស្រាអែល បានរារាំងអ៊ីរ៉ង់មិនឲ្យផលិតបានគ្រាប់បែកនុយក្លេអ៊ែរ ដោយការចាប់ផ្តើមសង្គ្រាមមួយនៅក្នុងខែមិថុនា ឆ្នាំ២០២៥ បន្ទាប់មក គឺយុទ្ធនាការបច្ចុប្បន្ន ដែលបានចាប់ផ្តើមកាលពីថ្ងៃទី២៨ ខែកុម្ភៈ។ លោកបានសង្កត់ធ្ងន់ថា សង្គ្រាមចុងក្រោយបំផុតត្រូវបានចាប់ផ្តើម បន្ទាប់ពីចារកម្មបានបង្ហាញថា មេដឹកនាំកំពូលអ៊ីរ៉ង់ លោក Ali Khamenei ដែលឥឡូវនេះ បានស្លាប់ហើយ បានប្រឹងប្រែងពង្រីកកម្មវិធីនុយក្លេអ៊ែរ និងមីស៊ីលរបស់ប្រទេស សូម្បីតែបន្ទាប់ពីសង្គ្រាមខែមិថុនា ឆ្នាំ២០២៥៕