អាជ្ញាធរលីបង់ កាលពីថ្ងៃសៅរ៍ (ទី១១ ខែមេសា ឆ្នាំ២០២៦) បានប្រាប់ឲ្យដឹងថា ការវាយប្រហាររបស់អ៊ីស្រាអែល បានសម្លាប់មនុស្សយ៉ាងតិច ២.០២០នាក់ ចាប់តាំងពីការចាប់ផ្តើមនូវសង្គ្រាម រវាងអ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់ កាលពីខែមុន។

របាយការណ៍ចំនួនអ្នកស្លាប់ថ្មីពីក្រសួងសុខាភិបាលលីបង់ រួមមានស្ត្រី ២៤៨នាក់ កុមារ ១៦៥នាក់ ហើយបុគ្គលិកពេទ្យ និងសង្គ្រោះបន្ទាន់ ៦៥នាក់ ខណៈមនុស្សយ៉ាងហោចណាស់ ៦.៤៣៦នាក់ រងរបួស ចាប់តាំងពីប្រទេសលីបង់ត្រូវបានទាញចូលទៅក្នុងសង្គ្រាមមជ្ឈិមបូព៌ា កាលពីថ្ងៃទី២ ខែមីនា។

ប្រហែល ៣ភាគ៤ នៃការវាយប្រហារតាមអាកាស ក្នុងអំឡុងពេលមានសង្គ្រាមមជ្ឈិមបូព៌ា បានកំណត់គោលដៅទីតាំង នៅក្នុងប្រទេសអ៊ីរ៉ង់ ឬលីបង់។ នេះបើយោងតាមការវិភាគរបស់សារព័ត៌មាន AFP ដោយផ្អែកលើទិន្នន័យពីស្ថាប័ន ACLED ជាអង្គការមិនស្វែងរកប្រាក់កម្រៃដែលតាមដានអំពើហិង្សានយោបាយទូទាំងពិភពលោក។

ជាមួយគ្នានេះ យ៉ាងហោចណាស់មានការវាយប្រហារចំនួន ៧.៧៧០លើក ឬការវាយប្រហារជាបន្តបន្ទាប់ដោយមីស៊ីល យានដ្រូន រ៉ូកែត ឬគ្រាប់បែក ត្រូវបានកត់ត្រាដោយក្រុមស្រាវជ្រាវជម្លោះនេះ ដែលមានមូលដ្ឋាននៅសហរដ្ឋអាមេរិក ចាប់ពីការចាប់ផ្តើមនូវសង្គ្រាម កាលថ្ងៃទី២៨ ខែកុម្ភៈ រហូតដល់ថ្ងៃទី៨ ខែមេសា ជាពេលដែលបទឈប់បាញ់ដ៏ផុយស្រួយបានឈានដល់ រវាងទីក្រុងតេអេរ៉ង់ និងវ៉ាស៊ីនតោន។

បើយោងតាមទិន្នន័យរបស់ ACLED គិតត្រឹមថ្ងៃទី៣ ខែមេសា បានបង្ហាញថា ប្រទេសលីបង់ ជាកន្លែងដែលអ៊ីស្រាអែលបាននិងកំពុងធ្វើយុទ្ធនាការ មានចំនួន ១ភាគ៣ នៃការវាយប្រហារ។ ប្រតិបត្តិការរបស់អ៊ីស្រាអែលកើតឡើងដោយសារចលនាគាំទ្រអ៊ីរ៉ង់ គឺក្រុមហេសបូឡា កាលពីថ្ងៃទី២ ខែមីនា បានចាប់ផ្តើមការវាយប្រហាររបស់ខ្លួន៕