អូស្ត្រាលីនៅថ្ងៃចន្ទនេះ បាននិយាយថា ស្ត្រីម្នាក់នឹងដឹកនាំកងទ័ពរបស់ខ្លួនជាលើកដំបូង ក្នុងប្រវត្តិសាស្ត្រ ដែលជាផ្នែកមួយនៃការរុះរើរចនាសម្ព័ន្ធថ្នាក់ដឹកនាំកងកម្លាំងការពារជាតិរបស់ប្រទេសនេះ។

រដ្ឋាភិបាលបាននិយាយនៅក្នុងសេចក្តីថ្លែងការណ៍មួយថា លោកស្រីឧត្តមសេនីយ៍ទោ Susan Coyle ដែលជាប្រធានសមត្ថភាពរួមបច្ចុប្បន្ន នឹងក្លាយជាមេបញ្ជាការកងទ័ព នៅក្នុងខែកក្កដា។ លោកស្រី នឹងជំនួសលោកឧត្តមសេនីយ៍ទោ Simon Stuart។

ការតែងតាំងលោកស្រី Coyle បានកើតឡើង នៅពេលដែលយោធាអូស្ត្រាលី កំពុងស្វែងរកការបង្កើនចំនួនមន្រ្តីដែលជាស្ត្រី នៅក្នុងជួរកម្លាំងរបស់ខ្លួន។ ប្រទេសនេះ ប្រឈមមុខនឹងការចោទប្រកាន់ពីបៀតបៀនផ្លូវភេទជាប្រព័ន្ធ និងការរើសអើង។

លោកនាយករដ្ឋមន្ត្រី Anthony Albanese បាននិយាយនៅក្នុងសេចក្តីថ្លែងការណ៍មួយថា៖«ចាប់ពីខែកក្កដាតទៅ យើងនឹងមានមេបញ្ជាការកងទ័ពស្ត្រីដំបូងគេបង្អស់ នៅក្នុងប្រវត្តិសាស្ត្រ ១២៥ឆ្នាំ របស់កងទ័ព អូស្ត្រាលី»។

រដ្ឋមន្ត្រីក្រសួងការពារជាតិ លោក Richard Marles បានហៅការតែងតាំងលោកស្រី Coyle ថា ជា«ព្រឹត្តិការណ៍ប្រវត្តិសាស្ត្រដ៏ជ្រាលជ្រៅ»៕