ក្បួនទូកដឹកជំនួយ Global Sumud (GSF) បានចាប់ផ្តើមចាកចេញពីកំពង់ផែ Barcelona កាលពីថ្ងៃអាទិត្យ ទី១២ ខែមេសា ដោយមានអ្នកគាំទ្រស្រែកហ៊ោអបអរ ខណៈសកម្មជនបានចាប់ផ្តើមបេសកកម្មស៊ីវិលឆ្ពោះទៅកាន់តំបន់ហ្កាហ្សា។ អ្នករៀបចំ បាននិយាយថា ស្ថានភាពនៅសមុទ្រដ៏លំបាក មានន័យថា ក្បួននាវានឹងធ្វើដំណើរបានយឺតៗ ហើយមិនត្រូវបានគេរំពឹងថានឹងធ្វើដំណើរចូលទៅកាន់ដែនទឹកអន្តរជាតិរហូតដល់ចុងសប្តាហ៍នេះ។

នៅក្នុងសន្និសីទសារព័ត៌មាន មុនពេលចេញដំណើរ លោក Thiago Avila សមាជិកនៃគណៈកម្មាធិការដឹកនាំក្បួនទូក Global Sumud (GSF) បាននិយាយថា ពួកគេកំពុងចាប់ផ្តើមកិច្ចខិតខំប្រឹងប្រែងនៅតាមសមុទ្រផ្នែកស៊ីវិលធំបំផុតមិនធ្លាប់មាន ក្នុងការប្រឈមទៅនឹងការបិទផ្លូវរបស់អ៊ីស្រាអែលនៅតំបន់ហ្កាហ្សា ខណៈទូកជាច្រើនគ្រឿងបានត្រៀមចាកចេញពីកំពង់ផែ Barcelona ។

អ្នករៀបចំបាននិយាយថា ទូកជាង៧០ គ្រឿងនឹងចូលរួម ដោយមានទូកចំនួន៣៩គ្រឿងចេញដំណើរដំបូងពីទីក្រុង Barcelona និងទូកផ្សេងទៀតចូលរួមនៅតាមផ្លូវ។ កិច្ចខិតខំប្រឹងប្រែងនេះ ធ្វើឡើងបន្ទាប់ពីបេសកកម្មកាលពីពេលមុន ត្រូវបានស្ទាក់ចាប់។ យោធាអ៊ីស្រាអែល បានបញ្ឈប់ទូកប្រហែល៤០គ្រឿងដែលប្រមូលផ្តុំដោយអង្គការតែមួយកាលពីខែតុលា ខណៈពួកគេព្យាយាមដើម្បីបានទៅដល់តំបន់ហ្កាហ្សាដែលត្រូវបានបិទផ្លូវ ដោយចាប់ខ្លួនសកម្មជនស៊ុយអែត Greta Thunberg និងអ្នកចូលរួមជាង៤៥០ នាក់ផ្សេងទៀត។